Քաղաքացիական Պայմանագիր խմբակցության անդամներ, երբ գալիս եք ու օրով ժամով ասում եք, որ Հայաստանի վրա հարձակվելու են, ամսաթիվ եք նշում, պայմանավորվե՞լ եք այդ հարձակման մասին։ Այս մասին մարտի 26-ին Ազգային ժողովի նիստում Կոռուպցիայի կանխարգելման հանձնաժողովի անդամի ընտրության հարցի քննարկման ժամանակ հայտարարեց ընդդիմադիր «Հայաստան» խմբակցության պատգամավոր Քրիստինե Վարդանյանը՝ դիմելով կառավարող «Քաղաքացիական պայմանագիր» խմբակցության պատգամավորներին:
«Որտեղի՞ց գիտեք այդ օրը, ժամը։ Որտեղի՞ց ձեզ էդ տեղեկատվությունը», — հարցրել է Վարդանյանը։ Պատգամավորը, մասնավորապես, հիշեցրել է, որ «Քաղաքացիական պայմանագրի» իշխանության օրոք Հայաստանը բազմիցս ագրեսիայի է ենթարկվել Ադրբեջանի կողմից։ «Ձեր համար «նորություն» ունեմ։ Ժողովուրդ, դուք եղել եք, ութ տարի է կաք ու չեմ կարողանում հաշվել քանի պատերազմ ու հարձակում է եղել Հայաստանի վրա», — ասել է խորհրդարանականը։ Պատգամավորի խոսքով՝ իրենց թիմը իշխանության է եղել 10 տարի, և այդ ժամանակահատվածում ոչ մի պատերազմ չի եղել։ «Տեսնո՞ւմ եք տարբերությունը», — հավելեց ընդդիմադիրը։
