Վրաստանում Էստոնիայի դեսպան Մարգե Մարդիսալու-Կահարը կանչվել է երկրի ԱԳՆ՝ Վրաստանի համալսարաններից մեկի (ԻՊՀ-ի) վերաբերյալ սոցցանցերում իր գրառման վերաբերյալ բացատրություն տալու համար, հաղորդում է Грузия Online-ը։
Նրան ընդունել է արտգործնախարարի առաջին տեղակալ Գիորգի Զուրաբաշվիլին, որը Մարդիսալու-Կահարին խնդրել է «բացատրել իր գործողությունների նպատակը»։
«Առաջին փոխնախարարն ընդգծել է, որ Էստոնիայի դեսպանի հայտարարությունը նպատակ ունի քաղաքականացնելու կրթական բարեփոխումները, ինչն անընդունելի է և երկրի ներքին գործերին միջամտելու փորձ է»,- ասվում է նախարարության հայտարարության մեջ։
ԱԳՆ-ն էստոնացի դիվանագետին բացատրել է, որ եթե Էստոնիան հետաքրքրված է Վրաստանում կրթական բարեփոխումներով, «հնարավոր է խորհրդակցություններ անցկացնել Վրաստանի կրթության, գիտության և երիտասարդության նախարարության հետ, որտեղ նրանք դրա մասին համապարփակ տեղեկատվություն կստանան»։
Ըստ լրատվամիջոցների հաղորդագրությունների՝ Վրաստանում Էստոնիայի դեսպանն ավելի վաղ սոցցանցում լուսանկար էր հրապարակել Իլյայի պետական համալսարանի ռեկտոր Նինո Դոբորժգինիձեի հետ՝ այն մակագրելով. «Կանգած ենք Իլյա համալսարանի կողքին»։
