76-ամյա «Խավարիի արքայազնը» շաբաթ երեկոյան իր վերջին համերգը տվեց Վիլլա Պարկում, որի տոմսերը վաճառվել էին 42,000 հանդիսատեսի համար: «Վերադարձ դեպի սկիզբ» համապատասխան անվանումով շոուն նրա հրաժեշտն էր կենդանի ելույթին՝ տասնամյակներ բեմում անցկացնելուց, վերջին հինգ տարիների ընթացքում յոթ վիրահատությունից և Պարկինսոնի հիվանդության դեմ երկարատև պայքարից հետո:
Նա բեմ դուրս եկավ սև գահին՝ մեջքին չղջիկ, հանդիսատեսի խլացնող ճիչերի ներքո: Օզին չզսպեց իր զգացմունքները՝ դիմելով երկրպագուներին.
«Դուք պատկերացում չունեք, թե ինչպես եմ զգում: Շնորհակալություն եմ հայտնում սրտիս խորքից»:
Համերգը սկսվել է I Don’t Know, Blizzard of Ozz, Suicide Solution հիթերով և ավարտվել լեգենդար Crazy Train-ով՝ կոնֆետիի համազարկի ներքո: Օսբորնը երգում էր նույն ուժով, խրախուսում էր հանդիսատեսին, թափահարում ձեռքերը, և նրա մարմնի յուրաքանչյուր ժեստ խոսում էր այն մասին, թե որքան մեծ նշանակություն ուներ այդ պահը նրա համար։
«Թող սկսվի խելագարությունը», — բացականչել է նա սկզբում՝ առաջացնելով ցնծության ալիք։
Նրա կինը՝ Շարոնը, և դուստրը՝ Քելլին, դիտում էին նրա ելույթը բեմից, իսկ հանդիսատեսի մեջ էր հայտնի բրիտանացի կատակերգու Ջո Լայսեթը, ով ավելի ուշ խոստովանել է, որ ամբողջ ելույթի ընթացքում լաց է եղել։
Այնուամենայնիվ, երեկոն դրանով չի ավարտվել։ Սոլո ելույթից հետո Օզին 2005 թվականից ի վեր առաջին անգամ վերամիավորվել է Black Sabbath-ի հետ։ Թոնի Այոմիի, Գիզեր Բատլերի և Բիլ Ուորդի հետ միասին նրանք փակել են շոուն՝ War Pigs, N.I.B., Iron Man և, իհարկե, Paranoid երգերով։
Մինչ խմբի ելույթը, ցուցադրվել է տեսահոլովակ, որտեղ երաժիշտները հիշում էին, թե ինչպես են հրաշքով փրկվել 70-ականների և 80-ականների տասնամյակների խելահեղ կյանքից։ Իսկ շոուի վերջում էկրանին հայտնվել են հետևյալ տողերը.
«Շնորհակալություն ամեն ինչի համար։ Դուք անհավանական եք։ Բիրմինգհեմ՝ հավերժ»: Իսկ մարզադաշտի վերևում երկինքը լուսավորվել է հրավառությամբ։
