ՀՀ վարչապետ Նիկոլ Փաշինյանը գործարար և բարերար, իսկ վերջերս նաև քաղաքական գործիչ և ՀՀ վարչապետի թեկնածու Սամվել Կարապետյանին «ռինգ է կանչել»՝ փոխաբերական իմաստով։
Մարտի 19-ի ճեպազրույցում Փաշինյանը հայտարարել է, որ պրոբացիայի ծառայությունը կարծում է, թե Կարապետյանը (որը գտնվում է տնային կալանքի տակ) կարող է խոսել ուղիղ եթերում։ Թե որքանով է դա համապատասխանում տնային կալանքի պայմաններին, պարզ չէ։ Այնուամենայնիվ, Փաշինյանը Կարապետյանին առաջարկել է ուղիղ եթերում շարադրել իր դիրքորոշումը, և «մի հատ հասկանանք՝ իրենք էդ ինչո՞վ են ուժեղ, մենք ինչո՞վ ենք թույլ»։
Վարչապետը վիրտուալ մրցակցին առաջարկել է «Եթե կարան էդ օլիգարխները 30 անգամ ձգվեն (ենթադրաբար խոսքը Սամվել և նրա եղբորորդի Նարեկ Կարապետյանների մասին է), թող ուղիղ եթերում 30 անգամ ձգվեն, ես չեմ կարա 30 անգամ ձգվեմ, բայց ես կարամ 100 կմ հեծանիվ քշեմ։ Իրենք թող ձգվեն, ես հեծանիվ քշեմ։ Ուրիշ ինչի՞ց են ուժեղ, ինտելեկտի՞ց։ Թող մտնեն ուղիղ եթեր, իրենց ինտելեկտը ցույց տան, թող իրենց բառապաշարը ցույց տան։ Ես համոզված եմ, որ երկու օլիգարխներն էլ թույլիկ են և՛ վերլուծական մտքով, և՛ բառապաշարով։ Ես կարծում եմ՝ դա շատ հեշտ է ապացուցել։ Իրենք ուժեղ են իրենց աշխատած փողերով, իրենք իրենց փողերն աշխատել են իրենց կոռուպցիոն պապաների միջոցով, իրենք թույլ են, որպես բիզնեսմեն՝ իրենք թույլիկ են։», — հայտարարել է Փաշինյանը։
Միևնույն ժամանակ նա հիշեցրել է հայտնի կադրը, որտեղ Պրիգոժինը (Եվգենի Պրիգոժին, խոսքը տարիներ առաջ Բուշի և Պուտինի ընթրիքի մասին է) սնունդ է մատուցում, ասելով, որ նրանք սնունդ են մատուցում նույնիսկ ոչ թե առաջին, այլ երրորդ և չորրորդ դեմքերին։
