Թրամփի վարչակազմը հինգշաբթի ԱՄՆ Գերագույն դատարանին խնդրել է միջամտել ԱՄՆ-ում բնակվող մոտ 6000 սիրիացիների արտաքսման պաշտպանությունը դադարեցնելու իր ջանքերին, հաղորդում է Reuters-ը։
Արդարադատության նախարարությունը շտապ կարգով Գերագույն դատարանին խնդրել է չեղյալ համարել դատավորի նոյեմբերյան որոշումը, որը խոչընդոտել էր ՝ սիրիացիների համար ժամանակավոր պաշտպանված կարգավիճակը (TPS) դադարեցնելու ոււղությամբ տարվող վարչակազմի ջանքերը, քանի դեռ այդ քայլը վիճարկող դատական գործընթացը շարունակվում է։
Սա արդեն երրորդ անգամն է, երբ վարչակազմը բողոք է ներկայացնում Գերագույն դատարան՝ ներգաղթյալների համար այս պաշտպանությունը դադարեցնելու իր ջանքերի վերաբերյալ։ Նախորդ երկու դեպքերում էլ դատարանը կողմ է եղել վարչակազմի քայլերին, ինչը հանգեցրել է հարյուր հազարավոր վենեսուելացիների համար ժամանակավոր պաշտպանված կարգավիճակի չեղարկմանը։
Ժամանակավոր պաշտպանված կարգավիճակը (TPS) պաշտպանություն է պատերազմից, բնական աղետներից կամ այլ աղետներից տուժած երկրներից ներգաղթյալների համար։ Այն պաշտպանում է նման կարգավիճակ ստացած անձանց արտաքսումից և նրանց թույլ տալիս աշխատել Միացյալ Նահանգներում։
Թրամփի օրոք Ներքին անվտանգության նախարարությունը որոշել է դադարեցնել TPS-ը 12 երկրների, դրանց թվում՝ Սիրիայի համար: Նմանատիպ դատական հայցերի արդյունքում դատարանի որոշումներ են ընդունվել, որոնք ներկայում արգելափակում են TPS-ի դադարեցումը այնպիսի երկրների քաղաքացիների համար, ինչպիսիք են Եթովպիան, Հարավային Սուդանը, Հայիթին, Սիրիան և Մյանման:
TPS-ն առաջին անգամ տարածվել է սիրիացիների վրա 2012 թվականին՝ նախկին նախագահ Բարաք Օբամայի վարչակազմի օրոք, երբ երկիրը հայտնվեց քաղաքացիական պատերազմի մեջ, որը գագաթնակետին հասավ նախագահ Բաշար Ասադի տապալմամբ 2024 թվականի դեկտեմբերին: Հանրապետական նախագահի նշանակած Ներքին անվտանգության նախարար Քրիստի Նոեմը սեպտեմբերին հայտարարեց, որ Սիրիայի ընդգրկումը TPS-ում կդադարեցվի՝ նշելով, որ այդ երկրի իրավիճակն «այլևս չի համապատասխանում շարունակվող զինված հակամարտության չափանիշներին, ինչը լուրջ սպառնալիք է Սիրիա վերադարձող սիրիացիների անձնական անվտանգության համար»:
