ԵՄ-ն մտադիր է սև ցուցակում ներառել 42 լցանավեր և առաջին անգամ պատժամիջոցներ կիրառել երրորդ երկրների՝ Ինդոնեզիայի և Վրաստանի նավահանգիստների նկատմամբ՝ ռուսական նավթով գործողությունների համար՝ Ռուսաստանի դեմ 20-րդ պատժամիջոցների փաթեթի շրջանակում, հաղորդում է Reuters-ը՝ հղում անելով ԵՄ անդամ պետություններին հաստատման համար Եվրոպական հանձնաժողովին ներկայացված փաստաթղթին։
Գործակալության տվյալներով՝ այդ պատժամիջոցները վերաբերում են Վրաստանի Կուլևի տերմինալին և Ինդոնեզիայի Քարիմուն նավահանգստին։ Բացի դրանից, գործակալությունը պնդում է, որ ԵՄ-ն մտադիր է պատժամիջոցներ կիրառել Տաջիկստանի, Լաոսի և Ղրղզստանի բանկերի նկատմամբ և վերացնել երկու չինական բանկերի նկատմամբ պատժամիջոցները։
Եվրոպական հանձնաժողովն ավելի վաղ հայտարարել էր, որ 20-րդ փաթեթում առաջին անգամ կփորձի լիակատար արգելք դնել ռուսական նավթի ծովային փոխադրմանն առնչվող ցանկացած գործողության։
