Իսրայելում հայտնաբերվել է 1700-ամյա հռոմեական սարկոֆագ, որը պատկերում է լեգենդար խմելու մրցույթ, հաղորդում է Live Science-ը՝ հղում անելով Իսրայելի հնությունների վարչությանը (IAA):
Հնագետները հայտնաբերել են եզակի արտեֆակտ, որը թվագրվում է մ.թ. երկրորդ կամ երրորդ դարերով, երկրի հյուսիսարևմտյան ափին գտնվող Կեսարիա հին քաղաքի մոտ:
Փորագրված մարմարե քարը պատկերում է կիսաստված Հերկուլեսի և Բաքոսի (հին հունական դիցաբանության մեջ սա Հերակլեսն ու Դիոնիսոսն են — խմբ.) միջև խմելու մրցույթ: Նմանատիպ տեսարաններ հանդիպում են նույն ժամանակաշրջանի խճանկարներում, բայց այս գտածոն նշանավորում է այս կոնկրետ տեսարանի առաջին հայտնվելը տարածաշրջանի սարկոֆագի վրա:
1700-ամյա սարկոֆագը թաղված էր ավազաբլուրի տակ և կոտրվել էր կտոր-կտոր, երբ հնագետները այն հայտնաբերել էին քաղաքում մի շարք պեղումների ժամանակ: Բեկորները հանելուց հետո վերականգնողները մաքրեցին և վերամիավորեցին դրանք՝ ամբողջական պատկերը բացահայտելու համար: Մարմարե դագաղի ամուր կողմերից մեկը պատկերում է Հերկուլեսին՝ պառկած առյուծի մորթու վրա։
«Մրցույթի ավարտին նա ձեռքում պահում է գինու բաժակ, և, իհարկե, նա այս դիրքում է, քանի որ մրցույթում Դիոնիսոսը, գինու աստվածը, որին ոչ ոք չի կարող հաղթել, հաղթանակ է տարել», — ասել է հնագետ Նոգար Շահարը: «Դիոնիսոսը պատկերված է ուրախ երթով՝ շրջապատված սատիրներով, կին հետևորդներով և Պանով՝ վայրի բնության աստվածով: Այս դեպքում, կարծես, կերպարները պարզապես տոնակատարություն չեն անում. նրանք իրականում ուղեկցում են մահացածին նրա վերջին ճանապարհորդության ժամանակ, երբ խմելն ու պարը վերածվում են ազատագրման և հանդերձյալ կյանք անցնելու խորհրդանիշի: Այս սարկոֆագը անսովոր տեսանկյուն է առաջարկում մահվան գաղափարի վերաբերյալ՝ ոչ թե որպես ավարտ, այլ որպես նոր ճանապարհորդության սկիզբ»:
