Անվտանգության խորհրդի մշտական անդամների հետ հանդիպման ժամանակ Ռուսաստանի նախագահ Վլադիմիր Պուտինն անդրադարձել է ԱՄՆ նախագահ Դոնալդ Թրամփի՝ Գրենլանդիան ձեռք բերելու մտադրությանը և Ալյասկայի օրինակով գնահատել է կղզու արժեքը։
Ըստ նրա՝ Գրենլանդիայի հետ տեղի ունեցողը Ռուսաստանին բոլորովին չի վերաբերում:
Միևնույն ժամանակ, Ռուսաստանի նախագահը հիշեցրել է, որ Վաշինգտոնի հետ նմանատիպ խնդիրներ լուծելու հարցում Մոսկվան փորձ ունի։
«19-րդ դարում, կարծեմ՝ 1867 թվականին, ինչպես գիտենք, Ռուսաստանն Ալյասկան վաճառեց Միացյալ Նահանգներին, և Միացյալ Նահանգները այն գնեց մեզանից։ Եվ եթե հիշողությունս ինձ չի դավաճանում, Ալյասկայի տարածքը կազմում է մոտ 1 միլիոն 717 հազար քառակուսի կիլոմետր, փոքր-ինչ ավելի։ Միացյալ Նահանգները Ալյասկան մեզանից գնեց 7,2 միլիոն ԱՄՆ դոլարով։ Այդ թվերն, իհարկե, պետք է ստուգվեն, բայց կարծում եմ՝ դա մոտավորապես այդպես է։ Այսօրվա գներով, հաշվի առնելով այս բոլոր տասնամյակների գնաճը, այդ թիվը 158 միլիոն դոլար կկազմեր»,- ասել է Պուտինը։
Ըստ ՌԴ նախագահի՝ Գրենլանդիայի տարածքը փոքր-ինչ ավելի մեծ է՝ «կարծեմ՝ 2 միլիոն 166 հազար քառակուսի կիլոմետր, և փոքր-ինչ ավելի»։
«Դա մոտ 449-450 հազար քառակուսի կիլոմետրի տարբերություն է»։ Եթե դա համեմատենք Միացյալ Նահանգների կողմից Ալյասկայի ձեռքբերման արժեքի հետ, Գրենլանդիայի գինը կկազմի մոտ 200-250 միլիոն դոլար»։
Այդ ժամանակվա ոսկու գների համեմատ այս թիվը կլիներ ավելի բարձր, հավանաբար մոտ մեկ միլիարդի։ Բայց կարծում եմ, որ Միացյալ Նահանգները կարող էր հաղթահարել այդ թիվը։ Եվ ամենակարևորը, Դանիան և Միացյալ Նահանգները նույնպես փորձ ունեն այդ հարցում։ Կարծեմ՝ Դանիան արդեն վաճառել է Վիրջինյան կղզիները 1917 թվականին, և Միացյալ Նահանգները գնել է դրանք։ Այսպիսով, նրանք ևս փորձ ունեն այս ոլորտում։
«Ի դեպ, Դանիան միշտ Գրենլանդիային վերաբերվել է որպես գաղութի և բավականին խիստ է եղել, եթե ոչ դաժան, նրա նկատմամբ։ Սկայն դա բոլորովին այլ հարց է, և դժվար թե հիմա որևէ մեկին հետաքրքրի։ Բայց դա, անշուշտ, մեզ չի վերաբերում։ Կարծում եմ՝ նրանք դա կկարգավորեն միմյանց միջև»,- ասել է Ռուսաստանի նախագահը։
