Ռուսաստանն առայժմ մնում է Մերձավոր Արևելքում ընթացող պատերազմի միակ շահողը, քանի որ էներգակիրների գները կտրուկ աճում են, իսկ Ուկրաինայի դեմ նրա մղած պատերազմի նկատմամբ ուշադրությունը թուլացել է։ Այս մասին երեքշաբթի օրը հայտարարել է Եվրոպական խորհրդի նախագահ Անտոնիու Կոշտան, հայտնում է Reuters-ը։
«Առայժմ այս պատերազմում կա միայն մեկ հաղթող՝ Ռուսաստանը», — Բրյուսելում ԵՄ դեսպանների առջև ունեցած ելույթի ժամանակ հայտարարել է Կոշտան: «Էներգակիրների գների աճին զուգընթաց՝ նա նոր ռեսուրսներ է ստանում Ուկրաինայի դեմ իր պատերազմը ֆինանսավորելու համար: Նա օգուտ է քաղում ռազմական ներուժի շեղումից, որը հակառակ դեպքում կարող էր ուղղվել Ուկրաինայի աջակցությանը: Եվ նա շահում է ուկրաինական ռազմաճակատի նկատմամբ ուշադրության նվազումից, քանի որ Մերձավոր Արևելքի հակամարտությունը մղվում է առաջին պլան»:
Եվրոպական խորհրդի նախագահն ընդգծել է ԵՄ-ի կողմից «կանոնների վրա հիմնված միջազգային կարգը պաշտպանելու» անհրաժեշտությունը, որը, նրա խոսքով, ներկայումս վիճարկվում է Միացյալ Նահանգների կողմից։ Նա նաև կոչ է արել Մերձավոր Արևելքի բոլոր կողմերին վերադառնալ բանակցությունների սեղանի շուրջ։ «Ազատությանն ու մարդու իրավունքներին հնարավոր չէ հասնել ռումբերի միջոցով։ Դրանք պահպանվում են միայն միջազգային իրավունքով։ Մենք պետք է խուսափենք հետագա էսկալացիայից։ Նման ուղին սպառնում է Մերձավոր Արևելքին, Եվրոպային և դրա սահմաններից դուրս գտնվող տարածքներին»,- ասել է Եվրախորհրդի ղեկավարը։
