«Բարսելոնայի» նախագահ Ժոան Լապորտան, որը հավակնում է վերընտրվել այդ պաշտոնում, մեկնաբանել է թիմի նախկին գլխավոր մարզիչ Չավիի հնչեցրած մեղադրանքներն առ այն, որ հենց ակումբի ղեկավարությունն է ձախողել Լիոնել Մեսսիի վերադարձը:
Օրերս տված հարցազրույցում Չավին պնդել էր, թե 2023 թվականին արգենտինացու տեղափոխությունը գրեթե համաձայնեցված էր, սակայն Լապորտան անձամբ է հրաժարվել և խոչընդոտել ակումբի լեգենդի վերադարձին: Նախագահի մեկ այլ թեկնածու Վիկտոր Ֆոնտի հետ բանավեճի ժամանակ Լապորտան ներկայացրել է իրադարձությունների զարգացման իր վարկածը.
«Մենք չկարողացանք երկարաձգել պայմանագիրը Մեսսիի հետ ֆինանսական պատճառներով։ Հետագայում՝ 2023 թվականի մարտի կեսերին, Չավին մոտեցավ ինձ և փոխանցեց, որ Մեսսին վերադառնալու ցանկություն է հայտնել։ Նա խնդրեց պայմանագիր նախապատրաստել, որպեսզի առաջարկն ուղարկվի Խորխե Մեսսիին (ֆուտբոլիստի հորը): Ես ուղարկեցի պայմանագիրը, սակայն մայիսին Խորխե Մեսսին եկավ իմ տուն և ասաց, որ որդու վերադարձը «Բարսա» անհնար է։ Նա նշեց, որ Լեոյի վրա չափազանց մեծ ճնշում կգործադրվի, և իրենք նախընտրել են տեղափոխվել «Ինտեր Մայամի»։ Ես պատասխանեցի, որ հարգում և լիովին ընդունում եմ նրանց որոշումը»,- Լապորտայի խոսքերը մեջբերում է BarcaTimes-ը։
Հիշեցնենք, որ Լիոնել Մեսսին ՊՍԺ-ից ազատ գործակալի կարգավիճակով ամերիկյան «Ինտեր Մայամի» տեղափոխվեց 2023 թվականի ամռանը։
