Իրաքի վարչապետ Մոհամմեդ Շիա ալ-Սուդանին այս երեքշաբթի ԱՄՆ պետքարտուղար Մարկո Ռուբիոյի հետ կայացած զրույցում հայտարարել է, որ Իրաքը չպետք է հենադաշտ դառնա Մերձավոր Արևելքում ընթացող պատերազմի շրջանակում հարձակումներ իրականացնելու համար։ Այս մասին հայտնում է AFP-ն։
Իրաքը սահմանակից է Իրանին, որին փետրվարի 28-ին ԱՄՆ-ն ու Իսրայելը զանգվածային հարվածներ են հասցրել, ինչպես նաև Պարսից ծոցի երկրներին, որոնց Իսլամական Հանրապետությունը պատասխան հարվածներ է հասցրել:
Ինչպես նշում է լրատվամիջոցը՝ պատերազմի մեկնարկից ժամեր անց Իրաքի օդային տարածքը լցվել էր բոլոր ուղղություններից թռչող կործանիչներով և հրթիռներով։
Ռուբիոյի հետ հեռախոսազրույցում ալ-Սուդանին ընդգծել է «այն կարևորությունը, որ Իրաքի օդային տարածքը, ցամաքը և ջրերը չպետք է օգտագործվեն որևէ ռազմական գործողության համար՝ ուղղված հարևան երկրների կամ տարածաշրջանի դեմ»։ Այս մասին նշված է վարչապետի մամուլի ծառայության տարածած հաղորդագրության մեջ։
Ալ-Սուդանին մերժել է «երկիրը շարունակվող հակամարտությունների մեջ ներքաշելու ցանկացած փորձ», ինչպես նաև «որևէ կողմից երկրի օդային տարածքի խախտումները»։
Իրաքը, որը երկար ժամանակ Վաշինգտոնի և Թեհրանի միջև անուղղակի պատերազմների դաշտ էր, հակամարտության մեջ է ներքաշվել հենց սկզբից։ Այդ ժամանակ ԱՄՆ-ն ու Իսրայելը մեղադրվել են իրանամետ խմբավորումներին հարվածելու մեջ, որոնք էլ իրենց հերթին հայտարարել են Իրաքում և ընդհանուր տարածաշրջանում ամերիկյան բազաների վրա հարձակումների մասին։ Պետքարտուղարության ներկայացուցիչ Թոմի Պիգոն նշել է, որ Ռուբիոն «խստորեն դատապարտել է Իրաքում, այդ թվում՝ Քուրդիստանում Իրանի և նրա հետ կապված ահաբեկչական զինյալ խմբավորումների հարձակումները»։ Նա կոչ է արել Իրաքին ձեռնարկել «բոլոր հնարավոր միջոցները՝ ամերիկյան դիվանագիտական անձնակազմի և օբյեկտների պաշտպանությունն ապահովելու համար»։
