ԱԺ «Քաղաքացիական պայմանագիր» խմբակցության պատգամավոր Արուսյակ Ջուլհակյանը «Ֆեյսբուք»-ի իր էջում անդրադարձել է Սամվել Ֆարմանյանի գրառումներին:
Դրանցից մեկում Ֆարմանյանը գրել է, թե Նիկոլ Փաշինյանն ու Աննա Հակոբյանը նախկինում «անխնամ, անլվա, աղքատ ու գեշ» են եղել, ու այդ մասին ոչ ոք չի հիշում: Մյուսում՝ նշել, թե ՔՊ պատգամավորները «Վաթսափով նամակ են ստացել Փաշինյանից ու կնոջից իրենց գովերգելու մասին»:
«Հիմա ո՞վ է հիշում 2015 թ. հուլիսյան այն գողտրիկ երեկոն, երբ Էլեկտրիկ Երևան շարժման շրջանակներում Բաղրամյան պողոտայից Աշոտյանին աշոտյան արեցինք: Ո՞վ է հիշում, որ Աշոտյանի հետ էր նաև Ֆարմանյանը, ու եթե Ֆարմանյանը լիներ մենակ, հիմա որոշ մարդկանց աշոտյան անելու փոխարեն ֆարմանյան անելիս պետք է լինեինք:
Ֆարմանյանը պիտի մինչև կյանքի վերջ Աշոտյանին մաղարիչ անի:
Սպասեք: Նոր սմս ստացա…
Հ.Գ. մոռացա ավելացնել․ ու սա Ամերիկյան համալսարանի դասախոս ա»,- գրել է Ջուլհակյանը:
Հիշեցնենք՝ ի պատասխան այս գրառումների՝ ՀՀ վարչապետի տիկին Աննա Հակոբյանը «Ֆեյսբուք»-ի իր էջում լուսանկարներ է հրապարակել իր և Նիկոլ Փաշինյանի մինչհեղափոխական կյանքից: Ավելին՝ դրանցից մեկը դրել որպես էջի գլխավոր նկար, մյուսը՝ հետնանկար:
