«Քաղաքացիական պայմանագիր» խմբակցության պատգամավոր Լիլիթ Մինասյանի նկատառմամբ՝ Լևոն Տեր-Պետրոսյանն ակամայից ընդունում է, որ Եկեղեցին քաղաքականությամբ է զբաղվում՝ ասելով՝ պետք է թուլացնել քաղաքական լարվածությունը:
Անդրադառնալով վարչապետ Նիկոլ Փաշինյանի այն հայտարարությանը, որ հանրությունը պետք է պատրաստ լինի Էջմիածնի հրապարակում հավաքվելու՝ պատգամավորը հակադարձում է ընդդիմախոսների այն պնդումներին, թե այնտեղ արյուն կթափվի:
Վերջինս ընդգծում է՝ վարչապետը շեշտել է՝ «կհավաքվենք հավատքով»: Ըստ նրա՝ ընդդիմադիրներն այս նախադասությունը վերծանել, վերծանել, վերջում դարձրել են արշավ և արյունահեղություն Մայր Աթոռի դեմ:
«Թե ինչից են պաշտպանում Մայր Աթոռը, մարդ չի հասկանում: Ամեն ինչ ուռճացնում են, վերջում ոչինչ չի լինում, ասում են՝ պաշտպանեցինք Մայր Աթոռը»,- նկատում է նա:
Մինասյանը հերքում է այն խոսակցությունները, թե Սամվել Կարապետյանի կողմից ստեղծվող նոր ուժը մտավախություններ է առաջացրել իշխանության շրջանում: Նա այս ուժին և նախկին իշխանության ներկայացուցիչներին նույն գծի մեջ է տեսնում:
Խոսելով ՀԷՑ-ի մասին՝ իշխող ուժի անդամն ասում է՝ սա ազգային անվտանգությանը սպառնացող ոլորտ է, և պետությունը չի կարող անտարբեր մնալ, ոմանց նման թքած ունենալ. «Կառավարությունը կգնա սպառողների իրավունքների պաշտպանության ճանապարհով»:
