Ձերբակալված գործարար և բարերար Սամվել Կարապետյանը միաժամանակ երեք երկրի քաղաքացիություն ունի։ Այս մասին հուլիսի 16-ին կայացած մամուլի ասուլիսում հայտարարել է ՀՀ վարչապետ Նիկոլ Փաշինյանը՝ խոսելով Կարապետյանի՝ Հայաստանում քաղաքական գործունեություն ծավալելու մտադրության մասին։
Ըստ նրա՝ յուրաքանչյուր մարդ կարող է քաղաքական գործունեություն ծավալել և Հայաստանում այդպես էլ լինում է, սակայն այս կոնկրետ դեպքում խնդիր է առաջացել օրենքի հետ և միայն դրանից հետո է հայտարարվել քաղաքական գործունեության մեկնարկի մասին, որպեսզի հետագայում հարցը աստիճանաբար տեղավորվի «քաղաքականապես հետապնդվողի» կարգավիճակում։ Նա հավելել է, որ կարևոր է հաշվի առնել իրադարձությունների հաջորդականությունը։ «Այնպիսի երկրներում, ինչպիսին Հայաստանն է, դա կարող է մոդա դառնալ. յուրաքանչյուր ոք, ով խնդիրներ ունի օրենքի հետ, կարող է հայտարարել քաղաքական գործունեության մեկնարկի մասին, որովհետև դա շատ լավ «տանիք» է՝ քաղաքական հետապնդման թեզը առաջ մղելու համար։ Սա հնարք է։ Թերևս լավ հնարք էր, բայց հնարք», — հավելել է Փաշինյանը։
Հիմնական նշանը, որ մարդն անկեղծորեն ցանկանում է քաղաքական գործունեություն ծավալել՝ գործընթացին իրական մասնակցություն ստանալու հնարավորությունն է, այսինքն՝ հնարավորություն ունենալ իր թեկնածությունն առաջադրելու խորհրդարան անցնելու համար։ Համաձայն Սահմանադրության՝ Սամվել Կարապետյանը նման իրավունք չունի, քանի որ հանդիսանում է երեք երկրի քաղաքացի։ Նույն պատճառով նա իրավունք չունի իր թեկնածությունն առաջադրել վարչապետի պաշտոնում։ «Իսկ ինչպե՞ս է նա մտադիր քաղաքական գործունեություն ծավալել։ Ցանկանու՞մ է լինել տիկնիկավա՞ր։ Ստեղծե՞լ մարիոնետային կառավարությո՞ւն։ Բայց Հայաստանը մարիոնետների թատրոն չէ», — նշել է Փաշինյանը։
