Ֆրանսիայի նախագահ Էմանյուել Մակրոնը կոչ է արել խստացնել դիրքորոշումը Իսրայելի նկատմամբ՝ ստիպելու քայլեր ձեռնարկել Գազայի հատվածում մարդասիրական իրավիճակը մեղմելու ուղղությամբ։
«Առաջիկա ժամերին և օրերին, եթե մարդասիրական իրավիճակի պահանջներին համապատասխանող արձագանք չլինի, հավաքական դիրքորոշումը, իհարկե, պետք է կոշտացվի», — այսօր Սինգապուրում հայտարարել է Մակրոնը։
Ելիսեյան պալատի ղեկավարը շեշտել է՝ այժմ ամեն ինչ կախված է Իսրայելի կառավարության որոշումներից։
«Այսօր շատ ակնհայտ է, որ մենք չենք կարող թույլ տալ, որպեսզի իրավիճակը շարունակվի», — շարունակել է Ֆրանսիայի առաջնորդը և պնդել, որ մարդասիրական օգնության արգելափակումը հանգեցնում է անկայուն իրավիճակի։
Նախագահ Մակրոնի խոսքով՝ առաջնահերթություն է ջրի, սննդի և դեղորայքի բաշխումը, ինչպես նաև վիրավորներին տարածաշրջանից հեռանալու թույլտվությունը։
Մարտի 18-ից ի վեր լիակատար շրջափակման մեջ գտնվող Գազայի հատված որոշակի քանակությամբ սնունդ է ներկրվել անցած օրերին, իրավիճակը, սակայն, ըստ ՄԱԿ-ի հումանիտար կառույցների, շարունակում է ծայրաստիճան լարված մնալ, անկլավում յուրաքանչյուր հինգերորդ բնակչի սպառնում է սով։
