Եթե ավտոտրանսպորտային միջոցների տեխնիկական զննությունը կամ դրանց վրա տեղադրված գազաբալոնների պարբերական վկայագրումը չեն իրականացվում պատշաճ կերպով, սակայն տվյալները միևնույն ժամանակ ներմուծվում են համակարգ, նշանակում է՝ դա տեղի է ունենում անբարեխիղճ գործարարների և քաղաքացիների փոխադարձ համաձայնությամբ։ Այս մասին մարտի 11-ին լրագրողների հետ հանդիպման ժամանակ հայտարարել է ՀՀ տարածքային կառավարման և ենթակառուցվածքների նախարարության ավտոմոբիլային տրանսպորտի ոլորտի քաղաքականության, լիցենզավորման և թույլտվությունների բաժնի պետ Արայիկ Ստեփանյանը։
Նրա խոսքով՝ գերատեսչությունը մտադիր է խստացնել գործարարների գործունեության նկատմամբ վերահսկողությունը և պատժամիջոցներ սկսել խախտումների հայտնաբերման դեպքում։ «Ցանկանում եմ նաև դիմել մեր վարորդներին՝ կոչ անելով ավելի լուրջ վերաբերվել վկայագրման գործընթացին, քանի որ գազաբալոններն այնպիսի սարքավորումներ են, որոնք կարող են լուրջ վտանգ ներկայացնել», — նշել է Ստեփանյանը։
Պաշտոնյայի խոսքով՝ վարորդները վճարում են լիցենզավորված կազմակերպություններին ծառայությունների մատուցման համար։ Հետևաբար, նրանք պետք է պահանջեն սպասարկման պատշաճ որակ։
