Իրանի պատերազմը կարող է վերածվել էկոլոգիական լուրջ սպառնալիքի՝ անկանխատեսելի հետևանքներով։ Ռազմական գործողությունների ժամանակ կիրառվող զինամթերքը, արդյուանբերական օբյեկտների թիրախավորումը մթնոլորտ են արտանետում հսկայական քանակությամբ թունավոր նյութեր։ Բնապահպանների պնդմամբ՝ սա ուղղակիորեն էկոլոգիական աղետ է։
Թեև մինչև այս պահը Հայաստանին սպառնացող վտանգ չի արձանագրվել, սակայն մասնագետների խոսքով, իշխանությունը պարտավոր է ձեռնարկել հանրային իրազեկման այնպիսի միջոցառումներ, որոնք քաղաքացուն կտան անհրաժեշտ գիտելիքներ և կկանխեն հնարավոր խուճապը վտանգի պահին
Ամենամեծ մտահոգությունը կապված է հնարավոր միջուկային հարվածների կամ ատոմային օբյեկտների վնասման հետ, ինչը ռադիացիոն վտանգի տակ կդնի ամբողջ տարածաշրջանը, առաջին հերթին՝ սահմանակից Սյունիքը։
Բնապահպան Սիլվա Ադամյանը պետական մակարդակով համակարգված մոտեցում դեռևս չի տեսնում։ Խուճապից խուսափելու լավագույն միջոցը, ըստ նրա, բնակչության իրազեկումն ու նախապատրաստումն է։ «Աստված մի արասցե, եթե մի լուրջ պայթույն լինի հյուսիսային հատվածում, վտանգված է ամբողջ Սյունիքը։ Ես չեմ վախեցնում, սա պետք է նկատի ունենալ։ Մարդկանց այս փուլում պետք է հիշեցնել ռադիացիայի պայմաններում վարքագծի կանոնները՝ ինչպես մեկուսացնել բնակարանը կամ ինչպես ճիշտ օգտագործել պաշտպանիչ միջոցներ։ Եթե ռադիացիոն ֆոնը բարձրացավ և տագնապ եղավ, ապա դրսում գտնվող մարդիկ պետք է անմիջապես մտնեն ներս, ցնցուղով լոգանք ընդունեն, դիմակներ կրեն ու պաշտպանիչ այլ գործողություններ կատարեն։ Գուցե իշխանությունը չի ուզում մարդկանց պանիկայի մեջ գցել, բայց հասարակությունը դրան պետք է պատրաստ լինի»,– նշեց ՍԻլվա Ադամյանը։ Նրա խոսքով՝ ճիշտ իրազեկումն ու նախապես մշակված գործողությունների պլանը միակ երաշխիքն են՝ հնարավոր աղետի ժամանակ անակնկալի չգալու համար։
