ԱՄՆ նախագահ Դոնալդ Թրամփը հրապարակավ հայտարարել է, որ Իրանը ցանկանում է բանակցություններ, սակայն իրանցի պաշտոնյաները պնդում են, որ կուլիսներում ճիշտ հակառակն է տեղի ունենում, հաղորդում է Drop Site-ը։
Իրանական կողմը նշում է, որ Թրամփի հատուկ բանագնաց Սթիվ Ուիթքոֆը մասնավոր կերպով կապ է հաստատել Իրանի արտգործնախարարի հետ՝ բանակցություններ կազմակերպելու համար, սակայն Թեհրանը անտեսել է հաղորդագրությունները և հայտարարել, որ առայժմ չի բանակցելու։
Երկու իրանցի պաշտոնյաներ հայտնել են, որ Ուիթքոֆն անցյալ շաբաթ անձամբ հաղորդագրություններ է ուղարկել Թեհրանի պաշտոնատար անձանց, դրանց թվում՝ արտգործնախարար Աբբաս Արաղչիին՝ բանակցությունների վերսկսման հնարավորությունն ուսումնասիրելու համար։ Իրանը չի պատասխանել Ուիթքոֆին։ Իրանի պաշտոնյաները Drop Site-ին ասել են, որ Իրանը հաղորդագրություններ է ստացել նաև Սպիտակ տնից՝ երրորդ երկրների միջոցով։
«Իրանի բարձրագույն ղեկավարության ընդունած որոշումների պատճառով նրա հաղորդագրություններին պատասխան չի տրվել,- Drop Site-ի հետ զրույցում հայտարարել է իրանցի բարձրաստիճան պաշտոնյան։ -Հաղորդագրությունը հստակ է. Իրանը հերթական անգամ փակել է ցանկացած ուղիղ բանակցությունների պատուհանը,- հավելել է նա։ -Զինադադար հայտարարելու լիազորությունը պատկանում է միայն Գերագույն առաջնորդին։ Իրանի արտգործնախարարը կամ որևէ այլ պաշտոնյա կամ կազմակերպություն այս հարցի վերաբերյալ օտարերկրյա կողմին հաղորդագրություններ չէր ուղարկի»։
