ԱԺ «Քաղաքացիական պայմանագիր» խմբակցության պատգամավոր Ալխաս Ղազարյանը «Ֆեյսբուք»-ի իր էջում անդրադարձել է Քննչական կոմիտեի վերջին հաղորդագրությանը, համաձայն որի՝ «Գազպրոմ Արմենիա» ՓԲԸ-ի աշխատակիցն ու կինը բռնություն գործադրելու սպառնալիքով անձին հարկադրել են 2026 թվականի հունիսի 7-ին կայանալիք Ազգային Ժողովի ընտրություններին ընտրել «Մեր ձևով» կուսակցության թեկնածուին, հակառակ պարագայում սպառնացել են պայթեցնել նրա բնակարանն այնպես, որ այդ ամենը ներկայացվի որպես դժբախտ պատահար:
«Այսօր Քննչական կոմիտեն հայտարարություն է տարածել, որ ամուսինները բռնություն գործադրելու սպառնալիքով անձին հարկադրել են 2026 թվականի հունիսի 7-ին կայանալիք Ազգային ժողովի հերթական ընտրություններին ընտրել «Մեր ձևով» կուսակցության թեկնածուին։ Այս առնչությամբ հարուցվել է հանրային քրեական հետապնդում:
Այս շրջանակները մոլորության մեջ են. անցել են ժամանակները, երբ նրանք կարող էին ՀՀ քաղաքացուն ստիպել վաճառել իր ձայնը։ Այսօր պետությունը կանգնած է քաղաքացիների և նրանց ընտրական իրավունքի կողքին։
Եվ նրանք, ովքեր կփորձեն կրկին գողանալ ՀՀ քաղաքացու քվեն, պետք է իմանան՝ նրանց սպասվում է պետության խիստ պատիժը»,- գրել է նա։
