Ղազախստանի Կենտրոնական ընտրական հանձնաժողովի մամուլի ծառայությունը հրապարակել է Ղազախստանում մարտի 15-ին կայացած նոր Սահմանադրության նախագծի վերաբերյալ հանրաքվեի վերջնական արդյունքները:
Պաշտոնական տվյալների համաձայն՝ հանրաքվեին մասնակցած քաղաքացիների 87.15 տոկոսը կողմ է արտահայտվել նոր Սահմանադրության նախագծին։
Հիմնական օրենքի նոր տարբերակի ընդունման օգտին քվեարկել է ընդհանուր առմամբ 7 մլն 954 հազար 667 մարդ։
Միևնույն ժամանակ առաջարկվող փաստաթղթի դեմ քվեարկել է ընտրողների 9.83 տոկոսը կամ 898 հազար 099 մարդ։
Անվավեր է ճանաչվել ավելի քան 146 հազար քվեաթերթիկ։
Հանձնաժողովի տվյալներով՝ ընտրողների մասնակցությունը կազմել է 73.1 տոկոս։ Ղազախստանի օրենսդրության համաձայն՝ հանրաքվեն վավեր համարելու համար քվեարկությանը պետք է մասնակցեր ընտրողների առնվազն կեսը։
Հիշեցնենք, որ հանրաքվեի ժամանակ քաղաքացիներին տրվել է մեկ հարց. «Հավանություն տալի՞ս եք Ղազախստանի Հանրապետության նոր Սահմանադրության նախագծին, որը հրապարակվել է լրատվամիջոցներում 2026 թվականի փետրվարի 12-ին»։
Նախագահ Կասիմ-Ժոմարտ Տոկաևի նախաձեռնությամբ պատրաստված նոր Սահմանադրության նախագիծը նախատեսում է երկրի քաղաքական կառավարման համակարգում մի շարք փոփոխություններ։
Փաստաթղթի համաձայն՝ Ղազախստանը նախատեսում է երկպալատ խորհրդարանական համակարգից անցնել միապալատ խորհրդարանի։ Այն նաև նախատեսում է պատգամավորների ընտրություն բացառապես կուսակցական ցուցակներով թեկնածուների ինքնաառաջադրման վերացմամբ։
Նախագիծը նաև նախատեսում է օրենսդրական նախաձեռնության իրավունքով նոր խորհրդատվական մարմնի՝ Ժողովրդական խորհրդի ստեղծում։ Նախկինում հաղորդվել էր, որ այս մարմինը կներառի նախագահի կողմից նշանակվող 126 անդամ։
Ավելին՝ նոր Սահմանադրության նախագիծը նախատեսում է փոխնախագահի պաշտոնի ներդրում, որը նշանակում է պետության ղեկավարը։ Միաժամանակ նախագահին տրվում է իրավունք՝ առանց խորհրդարանի համաձայնության, կառավարության կարևոր պաշտոններում նշանակել մարդկանց։
