Էստոնիան պատրաստ է անհրաժեշտության դեպքում իր տարածքում տեղակայել ՆԱՏՕ-ի դաշնակիցների միջուկային զենքը։ Այս մասին հայտարարել է Էստոնիայի արտաքին գործերի նախարար Մարգուս Ցախնան, ինչպես մեջբերում է ERR-ը։
«Մենք դեմ չենք մեր տարածքում միջուկային զենքի տեղակայմանը։ Մենք չունենք որևէ դոկտրին, որը կբացառի դա, եթե ՆԱՏՕ-ն անհրաժեշտ համարի, մեր պաշտպանական ծրագրերի համաձայն, մեր տարածքում տեղակայել, օրինակ, միջուկային զենք», — ասել է նա։
Էստոնիան չունի սեփական միջուկային զենք։
2025 թվականի սեպտեմբերին Էստոնիայի պաշտպանության նախարար Հաննո Պևկուրը հայտարարել է, որ Էստոնիան պատրաստ է իր տարածքում տեղակայել միջուկային մարտագլխիկներ կրելու ունակ բրիտանական կործանիչներ։
Bloomberg-ը նախկինում հայտնել էր, որ եվրոպական երկրները Սառը պատերազմի ավարտից ի վեր առաջին անգամ քննարկում են սեփական միջուկային պաշտպանության համակարգի ստեղծման հարցը, քանի որ Միացյալ Նահանգները այլևս հուսալի ռազմական գործընկեր չէ։ Եվրոպան ներկայումս պաշտպանված է ԱՄՆ «միջուկային հովանոցի» կողմից, որը բաղկացած է մայրցամաքում տեղակայված ամերիկյան զենքից։ Միայն Մեծ Բրիտանիան և Ֆրանսիան ունեն սեփական միջուկային զենք։
Լեհաստանի նախագահ Կարոլ Նավրոցկին փետրվարի 15-ին հայտարարել է, որ երկիրը պետք է հետամուտ լինի սեփական միջուկային զենքի մշակմանը: Պատասխանելով Մոսկվայի հնարավոր գործողությունների մասին հարցին, եթե Լեհաստանը սկսի աշխատանքները միջուկային ծրագրի վրա, Նավրոցկին ասել է, որ «Ռուսաստանը կարող է ագրեսիվ արձագանքել ցանկացած բանի»:
