ՀՀ Ազգային ժողովի նախագահ Ալեն Սիմոնյանը հայտնել է, որ ՌԴ Դաշնային խորհրդի ղեկավար Վալենտինա Մատվիենկոյի հետ վերջին հեռախոսազրույցը կրել է բացառապես շնորհավորական բնույթ։
Սիմոնյանը ճեպազրույցի ընթացքում նշել է, որ զանգը կապված է եղել իր գործընկերոջ ծննդյան օրվա հետ։ Նրա խոսքով՝ Մատվիենկոյի հետ ունի հարգալից և բաց հարաբերություններ, և շփումները միշտ ընթանում են փոխադարձ հարգանքի մթնոլորտում։
ԱԺ նախագահը նաև տեղեկացրել է, որ մի քանի օրից մեկնելու է Ստամբուլ, որտեղ նախատեսում է մասնակցել Միջխորհրդարանական միության 152-րդ համաժողովին։ Նրա խոսքով՝ այնտեղ հնարավոր է ոչ պաշտոնական շփում Մատվիենկոյի հետ։
Սիմոնյանը ավելի վաղ հայտնել էր, որ համաժողովի շրջանակում նախատեսված են նաև հանդիպումներ Վրաստանի և Ադրբեջանի խորհրդարանների ղեկավարների հետ։
