Ամերիկացի փորձագիտական համայնքում սրվել է ԱՄՆ Կիբերհրամանատարության (USCYBERCOM) բարեփոխման և նույնիսկ Զինված ուժերի առանձին ճյուղի՝ Տիեզերական ուժերի նման կիբերուժի ստեղծման անհրաժեշտության մասին բանավեճը։ Սա ԱՄՆ բանակի կիբերինստիտուտի հրատարակած The Cyber Defense Review-ի հատուկ թողարկման գլխավոր թեման է դարձել։
Պարբերականի հեղինակները մատնանշում են կիբերուժի այժմյան մոդելի լուրջ խնդիրները, որոնց թվում՝ անձնակազմի մշտական պակասը, մասնագետների վերապատրաստման և պահպանման դժվարությունները, ինչպես նաև հրամանատարության և վերահսկողության բարդ համակարգը։ Նրանք նշում են, որ ԱՄՆ զինված ուժերում CYBERCOM 2.0 բարեփոխումների ծրագրի իրականացումը դժվարությունների է բախվում։
«Զինված ուժերի գործող ճյուղերը կառուցվածքային առումով անհարմար են կիբերտարածության համար։ Դոկտրինը նույնպես սխալ է, քանի որ կիբերգործողությունները հաճախ միավորվում են էլեկտրոնային պատերազմի հետ և դիտվում են պարզապես որպես կինետիկ գործողությունների աջակցություն, այլ ոչ թե որպես անկախ մարտադաշտ»,- նշվում է խմբագրականում։
Մի քանի փորձագետ, որոնց թվում՝ մայոր Նիք Սթարքը և գնդապետ Թոդ Արնոլդը, առաջարկում են դիտարկել այլընտրանքային կազմակերպչական մոդելներ, մասնավորապես՝ առանձին ծառայության ստեղծումը: Սակայն այլ փորձագետներ, որոնց թվում՝ պատմաբաններ Մայքլ Ուորները և Էմիլի Գոլդմանը, զգուշացնում են արմատական փոփոխությունների առումով՝ նշելով բյուրոկրատացման և իրական մարտական առաքելությունների հետ կապի կորստի ռիսկերը։
ԱՄՆ կիբերհրամանատարությունը ստեղծվել է 2009 թվականին՝ Buckshot Yankee-ի միջադեպից հետո (2008 թվականին Պենտագոնի գաղտնի ցանցերի կոտրումը): Այդ ժամանակվանից ի վեր դրա հեղինակությունն ու բյուջեն զգալիորեն աճել են, սակայն աճող սպառնալիքների պայմաններում դրա կառուցվածքի արդյունավետության վերաբերյալ հարցերը շարունակում են մնալ արդիական:
