Մենք շարունակում ենք բանակցությունները ռուսական կողմի հետ՝ Հայաստանն Ադրբեջանին և Թուրքիային կապող երկաթուղիների վերականգնման շուրջ։ Այս մասին փետրվարի 3-ին լրագրողների հետ հանդիպման ժամանակ հայտարարել է ՀՀ տարածքային կառավարման և ենթակառուցվածքների նախարար Դավիթ Խուդաթյանը:
Նա պարզաբանել է, որ Հայաստանի իշխանությունների պատկերացմամբ՝ նշված տեղամասերում աշխատանքները պետք է իրականացվեն ռուսական կողմից։ Նախարարը հավելել է, որ փոփոխություններ չկան։ «Ակնկալում ենք, որ այս մասով վերջնական որոշում կունենանք, բայց այս պահին դեռ չունենք»,- ընդգծել է Խուդաթյանը։
Ավելի վաղ Հայաստանի վարչապետ Նիկոլ Փաշինյանը Ռուսաստանին կոչ է արել հրատապ կարգով վերականգնել երկաթուղու տեղամասերը՝ Երասխից մինչև Նախիջևանի սահման, Իջևանից մինչև Ղազախ (Ադրբեջան), ինչպես նաև Ախուրիկից մինչև Թուրքիայի սահման։
