Կան այս վամպիրները, հիմա կարող եմ ասել՝ Բրյուսելի վամպիրներ, որոնք սողոսկում են սովորական մարդկանց վրա և ասում. «Եթե ուզում եք, մենք ձեզ կկծենք, և դուք կդառնաք մեզ նման. դուք չեք տեսնի ձեր արտացոլանքը հայելիների մեջ, կվախենաք արևի լույսից, ձեզ էներգիայի կարիք չի լինի և այլն»։
Այս մասին հայտարարել է Ռուսաստանի արտաքին գործերի նախարարության խոսնակ Մարիա Զախարովան՝ մեկնաբանելով Եվրամիության դիվանագետ Կայա Կալլասի հայտարարությունները, որ ԵՄ-ն 15 միլիոն եվրո կհատկացնի Հայաստանի դիմադրողականությունը Ռուսաստանի նկատմամբ բարձրացնելու համար՝ երկրի խորհրդարանական ընտրություններից առաջ, ինչպես նաև ԵՄ ընդլայնման հարցերով գերագույն հանձնակատար Մարտա Կոսի հայտարարությունն այն մասին, որ ԵՄ-ն 500 միլիոն եվրո կներդնի Հայաստանի էներգետիկ անվտանգության և դիվերսիֆիկացիայի ամրապնդման գործում՝ Ռուսաստանից կախվածությունը նվազեցնելու համար։
«ԵՄ ներկայացուցիչներ Կայա Կալլասը և Մարտա Կոսը բառացիորեն բացահայտեցին իրենց. նրանց հայտարարությունները ևս մեկ անգամ ապացուցում են, որ Բրյուսելի միակ նպատակը Երևանի հետ հարաբերություններում, ըստ էության, Ռուսաստանի հետ Հայաստանի հարաբերությունները վնասելն է», — հայտարարել է Զախարովան։
Զախարովայի խոսքով՝ Բրյուսելը դադարել է թաքցնել դա, կամ գուցե կցանկանար, բայց եվրոպացի պաշտոնյաների «մտավոր կարողությունները» խանգարում են նրանց դա անել։ «Մենք տեսնում ենք, և նրանք կրկին ասում են. Եվրամիությունը փորձում է ցանկացած միջոցով խաթարել մեր ավանդական, փոխշահավետ և փոխադարձ հարգանքի արժանի գործընկերությունը Հայաստանի տնտեսության համար կարևոր ոլորտներում, այդ թվում՝ էներգետիկայի ոլորտում։ Հայ հասարակությունը բացասական փորձ չունի հայ-ռուսական էներգետիկ համագործակցության հետ։ Մենք ունենք ենթակառուցվածքներ, փոխշահավետ երկխոսություն և իրական համագործակցություն»։
