Վրաստանի նախագահ Սալոմե Զուրաբիշվիլին կրկին պնդել է նոր խորհրդարանական ընտրություններ անցկացնելու անհրաժեշտությունը։
Նա շեշտել է, որ քվեարկության օրը պետք է համաձայնեցվի մինչև դեկտեմբերի 29-ը։ Դեկտեմբերի 29-ին լրանում է Զուրաբիշվիլիի լիազորությունների ժամկետն, իսկ «Վրացական երազանքը» նախատեսում է անցկացնել նոր ընտրված նախագահ Միխեիլ Կավելաշվիլիի երդմնակալության արարողությունը։
Զուրաբիշվիլին վերահաստատել է «Վրացական երազանքի» պատվավոր նախագահ Բիձինա Իվանիշվիլիի հետ հանդիպելու իր պատրաստակամությունը։
«Որպեսզի երկրում ամեն ինչ լավ ավարտվի, թող նա գա (նախագահական) պալատ, քանի որ նա վերահսկում է ամեն ինչ։ Ես պատրաստ եմ նստել և մտածել նրա հետ, թե ինչպես պետք է նշանակվեն ընտրությունները», — նախօրեին Թբիլիսիի Ռուսթավելի պողոտայում հավաքվածների հետ հանդիպման ժամանակ հայտարարել է երկրի գործող նախագահը։
Վրաստանի վարչապետ Իրակլի Կոբախիձեն, ում լեգիտիմությունը չեն ճանաչում ընդդիմությունն ու նախագահը, ընդգծել է, որ նոր ընտրություններ նշանակելու պատճառ չկա։ Նա կիրակի օրը սպառնացել է Զուրաբիշվիլիի նկատմամբ քրեական հետապնդում իրականացնել, եթե վերջինս գերազանցի իր լիազորությունները և հայտարարի նոր ընտրություններ անցկացնելու մասին, ինչպես նաև եթե հրաժարվի հեռանալ նախագահական պալատից։
Կոբախիձեն ասել է, թե ոչ ոք չի ցանկանում 72-ամյա նախագահին բանտ ուղարկել, ուստի հույս ունի, որ Զուրաբիշվիլին «բավականաչափ խոհեմություն կունենա»։ Զուրաբիշվիլին էլ, իր հերթին, հայտարարել է, թե չի վախենում բանտում հայտնվելուց։
