Ուկրաինայի նախագահ Վլադիմիր Զելենսկին կիրակի օրը հայտարարել է, որ 106 երկրներ և կազմակերպություններ մինչ այժմ հաստատել են իրենց մասնակցությունը հունիսի կեսերին Շվեյցարիայում կայանալիք գագաթնաժողովին, որի նպատակն է խաղաղություն հաստատել պատերազմից ավերված իր երկրում:
Նա ելույթ է ունեցել Սինգապուրում անցկացվող Անվտանգության խնդիրներին նվիրված տարածաշրջանային համաժողովին, որին մասնակցում էին 55 երկրների ղեկավարներ, բարձրաստիճան նախարարներ և պաշտոնյաներ:
Զելենսկին միաժամանակ ասել է, որ հիասթափված է՝ որոշ համաշխարհային առաջնորդներ դեռ չեն առաջարկել իրենց աջակցությունը: Իսկ Ռուսաստանը, ըստ նրա, փորձում է ձախողել խաղաղության ջանքերը։
Ուկրաինայի առաջնորդը նաև շնորհակալություն է հայտնել երկրներին, այդ թվում՝ ԱՄՆ-ին, Գերմանիային և Նիդեռլանդներին ցուցաբերած ռազմական օգնության համար՝ հատկապես ՀՕՊ համակարգերի տեսքով։
