ՀՀ վարչապետը հայտարարել է, որ շատ կարևոր է նոր ատոմակայանի կառուցման նախագիծը՝ նշելով, որ կայացվել է ռազմավարական որոշում՝ Հայաստանը պետք է ունենա մոդուլյար ատոմակայան։
Այս մասին նա ասել է Երևանում անցկացվող Համաշխարհային հայկական գագաթնաժողովի ժամանակ:
«Այսինքն՝ փոքր տիպի մոդուլյար ատոմակայան: Ինչո՞ւ։ Ամենակարևոր պատճառներից մեկն այն է, որ մոդուլյար ատոմակայանի հնարավոր վթարը համարվում է տեղային նշանակության միջադեպ, այսինքն՝ նման դեպքում 500 մետր հեռավորության վրա գտնվող բնակչությանը չեն տարհանում։ Այսինքն՝ վթարը տեղային է ու միջավայրին չի սպառնում։ Եվ սա ակնհայտ դարձրեց, որ պետք է գնանք այս ճանապարհով»,- ասել է վարչապետը։
Նրա խոսքով՝ մոդուլային ատոմակայանների տեխնոլոգիայի կիրառման փուլին է հասել մի քանի երկիր. «Մենք աշխատում ենք գործընկերների հետ, և այստեղ խնդիր կա, որ այս պահին աշխարհում դեռևս գործող մոդուլյար ատոմակայան չկա, կան կառուցվողներ։ Մեր համոզմունքն այն է, որ դա անխուսափելի բան է և միանշանակ լինելու է»։
Վարչապետն ընդգծել է՝ Հայաստանն ունենալու է մոդուլյար ատոմակայան, որը և՛ երկրի ներսում, և՛ շրջակա երկրների համար որևէ սպառնալիք չի ներկայացնի։
