Միացյալ Նահանգները Լիբանանում տեղի ունեցած փեյջերների պայթյունների հետ որևէ առնչություն չունի, Կահիրե կատարած այցի ընթացքում այսօր հայտարարել է Միացյալ Նահանգների պետքարտուղար Էնթոնի Բլինքենը։
«Վաշինգտոնում այս գործողության մասին նախապես տեղյակ չեն եղել։ Այժմ ամերիկյան կառույցները զբաղված են տեղեկատվության հավաքագրմամբ», — նշել է ամերիկյան դիվանագիտության ղեկավարը։
Նա նաև ասել է, որ ԱՄՆ իշխանությունները համարում են, որ հակամարտող կողմերից որևէ մեկը չպետք է դիմի այնպիսի քայլերի, որոնք կարող են էլ ավելի սրել իրավիճակը տարածաշրջանում։
Սեպտեմբերի 17-ին Լիբանանում փեյջերների միաժամանակյա պայթյունների հետևանքով, ըստ վերջին տվյալների, 11 մարդ զոհվել է, ևս 3 հազարը տարբեր աստիճանի վնասվածքներ են ստացել։
Լիբանանի իշխանությունների ներկայացուցիչները փոխանցել են, որ իրենց համոզմամբ՝ փեյջերներում պայթուցիկ սարքերը տեղադրվել են իսրայելական հատուկ ծառայությունների կողմից։
