ՆԱՏՕ-ի գլխավոր քարտուղար Յենս Սթոլթենբերգը կասկածում է Վլադիմիր Պուտինի այն հայտարարություններին, թե Ռուսաստանի խորքին արևմտյան զենքով հարվածները կարող են դառնալ «կարմիր գիծ», որից հետո դաշինքը կհայտնվի Ռուսաստանի Դաշնության հետ պատերազմական վիճակում։ Սթոլթենբերգն այն անվանել է կեղծ, ինչպես ՌԴ նախագահի բազմաթիվ այլ սպառնալիքներ։
Նա հիշեցրել է, որ Պուտինը նախկինում մեկ անգամ չէ, որ խոսել է «կարմիր գծերի» մասին, սակայն դրանք հատելուց հետո Մոսկվայի կողմից արձագանք չի եղել։ «Նա չհամարձակվեց դա անել, քանի որ հասկանում է. ՆԱՏՕ-ն աշխարհի ամենահզոր ռազմական դաշինքն է։ Բացի այդ, Ռուսաստանը գիտակցում է, որ միջուկային պատերազմում հնարավոր չէ հաղթել, և դրան մասնակցելն անընդունելի է։ Մենք դա բազմիցս փոխանցել ենք Պուտինին»,- ընդգծել է Սթոլթենբերգը The Times-ին տված հարցազրույցում։
ՆԱՏՕ-ի գլխավոր քարտուղարը նշել է, որ Պուտինն այժմ փորձում է միավորել ավտորիտար պետություններին, ինչպիսիք են Ռուսաստանը, Չինաստանը, Իրանը և Հյուսիսային Կորեան ուկրաինական պատերազմի շուրջ, սակայն Մոսկվան գնալով ավելի է դառնում կախված Պեկինից։ Նշված երկրների դաշինքում առաջատար դերը խաղում է Չինաստանը, որը նաև Կրեմլի հիմնական աջակիցն է, հավելել է Սթոլթենբերգը։ Նա հիշեցրել է, որ հենց Չինաստանն է ակտիվորեն աջակցում Ռուսաստանի ռազմական տնտեսությանը, այդ թվում՝ մատակարարելով միկրոէլեկտրոնիկա և միկրոպրոցեսորներ, որոնք օգտագործվում են Ուկրաինայում օգտագործվող հրթիռների և ռումբերի արտադրության համար։
Սթոլթենբերգը հավելել է, որ Ռուսաստանը, Չինաստանի օգնության դիմաց, նրան է փոխանցում իր տեխնոլոգիաները, սակայն չի հստակեցրել, թե կոնկրետ ինչ տեխնոլոգիաների մասին է խոսքը։
Գլխավոր քարտուղարը պաշտպանել է նաև Մեծ Բրիտանիայի և Ֆրանսիայի դիրքորոշումը, որոնք հանդես են գալիս Ռուսաստանի խորքում արևմտյան զենքով հարվածների հաստատման օգտին։ «Սխալ է ասել, որ ՆԱՏՕ-ի դաշնակիցները կդառնան հակամարտող կողմ, եթե թույլ տան զենքի կիրառումը Ռուսաստանի տարածքում օրինական թիրախների դեմ: Հյուսիսային Կորեան և Իրանը զգալի ռազմական աջակցություն են ցուցաբերում և հրթիռներ ու անօդաչու սարքեր են մատակարարում Ռուսաստանին՝ չդառնալով հակամարտության անմիջական կողմ»,- պարզաբանել է նա։
Սեպտեմբերի 12-ին Պուտինը հայտարարել էր, որ արևմտյան հեռահար զինատեսակներով հարվածները Ռուսաստանի տարածքի խորքում կնշանակեն ՆԱՏՕ-ի և ԱՄՆ-ի պատերազմ Ռուսաստանի դեմ: The Times-ին ծանոթ աղբյուրները պնդում են, որ Վաշինգտոնը մտադիր չէ թույլ տալ Ուկրաինային օգտագործել ամերիկյան ATACMS հրթիռները նման հարձակումների համար։ Միևնույն ժամանակ, ակնկալվում է, որ սեպտեմբերի 22-23-ին Նյու Յորքում կայանալիք ՄԱԿ-ի Գլխավոր ասամբլեայում ԱՄՆ-ը կհամաձայնի բրիտանական հեռահար հրթիռների օգտագործմանը Ռուսաստանի Դաշնության խորքերը հարվածների համար:
