ԱՄՆ նախագահ Դոնալդ Թրամփը կենտրոնացել է Իրանի հիմնական խոցելիության վրա, քանի որ համաշխարհային տնտեսության համար պատերազմի ռիսկերը սրվում են, գրում է Axios-ը։
Թրամփը սրում է սպառնալիքները Խարգ կղզու նկատմամբ, որտեղ Իրանը վերամշակում է իր նավթի մեծ մասը, մինչդեռ երկիրը պահպանում է վերահսկողությունը Հորմուզի նեղուցի վրա։
Նախագահը երկուշաբթի լրագրողներին հայտնել է, որ անցյալ շաբաթավերջին ԱՄՆ-ի հարձակումներից հետո քննարկում է Խարգ կղզու վրա հետագա հարվածներ հասցնելու հնարավորությունը։ «Մենք կարող էինք դա անել հինգ րոպեում, և ամեն ինչ կավարտվեր, բայց երկրի ապագա վերականգնման նպատակներով ես կարծում եմ, որ մենք ճիշտ բան ենք արել, թեև դա կարող է փոխվել»,- ասել է նա։
Ավելի վաղ Թրամփը հայտարարել էր, որ ԱՄՆ-ը հարվածել է կղզում տեղակայված ռազմական օբյեկտներին, սակայն Truth Social սոցիալական ցանցում նա հայտնել է, որ Իրանի նավթը պահպանվել է «պարկեշտության նկատառումներից ելնելով»։ Սակայն նա հավելել է, որ «անմիջապես կվերանայի այդ որոշումը», եթե նեղուցով լցանավերի անցումը փակվի, և NBC News-ին ասել է, որ ԱՄՆ-ն «կարող է ևս մի քանի հարվածներ հասցնել կղզուն, պարզապես հաճույքի համար»։
Խարգ կղզում նավթի արտահանման ենթակառուցվածքների խափանումը բացասաբար կանդրադառնա համաշխարհային էներգետիկ շուկայի վրա։
Թրամփը դաշնակիցներին կոչ է արել օգնել ԱՄՆ-ին բացել Հորմուզի նեղուցը, սակայն դաշնակիցները մեծ մասամբ մերժել են նրա առաջարկները։
Խարգ կղզին Իրանի ափից 15 մղոն հեռավորության վրա ռազմավարական տերմինալ է, որի միջով է անցնում նավթի արտահանման մոտ 90%-ը։
Խարգ կղզու տերմինալի վրա ուղղակի հարվածը կխաթարի այդ առաքումների մեծ մասը։ Իրանն այս տարի օրական արտահանել է 1,7 միլիոն բարել նավթ, որից 1,55 միլիոն բարելն անցել է Խարգով։
Չինաստանն իրանական նավթի հիմնական ներմուծողն է։ CNN-ն անցյալ շաբաթ հաղորդել է, որ Թեհրանը քննարկում է որոշ լցանավերի նեղուցով անցնելու հնարավորությունը, եթե նավթը վաճառվի չինական յուանով։
ԱՄՆ-ը հարվածներ է հասցրել երկրի տարբեր թիրախներին, սակայն հիմնականում կենտրոնացել է Պարսից ծոցի ափին և Խարգ կղզու վրա։
Թրամփին հրապուրում է Խարգ կղզու լիակատար գրավման գաղափարը, քանի որ դա կլինի «տնտեսական հարված ռեժիմին», ըստ էության՝ Թեհրանին զրկելով ֆինանսավորումից, ասել է ԱՄՆ պաշտոնյան։ Սակայն դա կարող է Իրանի կողմից Պարսից ծոցի նավթային օբյեկտների և խողովակաշարերի, մասնավորապես՝ Սաուդյան Արաբիայի դեմ պատասխան հարվածներ հասցնելու պատճառ դառնալ։ «Կան մեծ ռիսկեր։ Կան մեծ պոտենցիալ պարգևներ։ Նախագահը դեռևս որոշում չի ընդունել, և մենք չենք էլ ասում, որ նա որոշում կընդունի»,- նշել է պաշտոնյան։
Նավթի և գազի գները բարձրանում են Իրանի կողմից Հորմուզի նեղուցի շրջափակման ֆոնին, որը կրճատում է համաշխարհային նավթի մատակարարումների զգալի մասը։
Եթե նեղուցը շուտով չբացվի, և նավթի գները շարունակեն կտրուկ աճել, դա կարող է զգալիորեն վնասել ԱՄՆ տնտեսական հեռանկարներին։
