Իտալիայի պաշտպանության նախարար Գվիդո Կրոզետոն հայտնել է, որ հարված է հասցվել Էրբիլում (Իրաք) գտնվող իտալական ռազմաբազային, սակայն զինծառայողների շրջանում տուժածներ չկան։
«Հրթիռն ընկել է Էրբիլի մեր բազայի տարածքում։ Իտալական անձնակազմի շրջանում զոհեր և վիրավորներ չկան, բոլորն անվտանգ վայրում են»,- նախարարի խոսքերն է մեջբերում ANSA գործակալությունը։
Ինչպես հստակեցրել է ԱԳ նախարար Անտոնիո Տայանին, Էրբիլի իտալական բազան գտնվում է մի համալիրում, որն ընդգրկում է նաև այլ երկրների բազաներ։ «Մենք չգիտենք՝ արդյոք թիրախը եղել են իտալացիները, թե ամբողջ կառույցն առհասարակ», — ասել է նա։ Ըստ նրա՝ այս պահին պարզ չէ՝ հրթիռն արձակվել է Իրանի տարածքից, թե դա եղել է Իրաքում գործող պրոիրանական խմբավորումների հրթիռը։
Ավելի վաղ նշվել էր, որ Մերձավոր Արևելքի տարածաշրջանում տարբեր առաքելությունների շրջանակներում գտնվում են շուրջ 2 հազար իտալացի զինվորականներ։ Մոտ 1 հազարը կազմում են Լիբանանում ՄԱԿ-ի ժամանակավոր ուժերի (UNIFIL) համակազմը։
