Իրաքցի քրդերը հայտնվել են Իրանի հետ անդրսահմանային պատերազմի «եռակի աքցանի» մեջ, գրում է Axios պարբերականը:
Նրանք կարծում են, որ ԱՄՆ նախագահ Դոնալդ Թրամփի ուղերձներում հստակորեն չի խոսվում հարևան Իրանում իշխանափոխության մասին:
Լրատվամիջոցի պնդմամբ, վարչակարգի դեմ պայքարող իրանցի քրդերը ստիպում են նրանց բացել սահմանը:
Իր հերթին, ըստ Axios-ի տվյալների, իրանական բանակը ուրբաթ օրը սպառնացել է իրաքցի քրդերին, եթե նրանք թույլ տան իրանցի քրդերին հարձակումներ ծրագրել:
Իրանի կողմից Իրաքի քրդերին ուղղված աննախադեպ նախազգուշացումը սպառնում է ընդլայնել հակամարտության աշխարհագրությունը։ Իրաքյան Քրդստանի իշխանությունները փորձում են ամեն կերպ խուսափել դրանից։ «Քրդերը չպետք է դառնան այս հակամարտության թիրախը կամ գործիքը»,- Axios-ին հայտնել է քրդական կառավարության բարձրաստիճան ներկայացուցիչը։
Երկրի հյուսիսի կիսաինքնավար տարածաշրջանը կառավարող Իրաքի քրդական կառավարությունը միշտ հպարտացել է նրանով, որ կարողանում է բանակցություններ վարել երկու կողմերի հետ: Սակայն ուրբաթ օրը Իրանի կառավարությունը փոխել է իր բարյացակամ տոնը՝ պաշտոնական հաղորդագրություն հրապարակելով սահմանի մյուս կողմում գտնվող իրանցի քրդական զինյալների վերաբերյալ։
«Եթե թույլատրվի նրանց հետագա ներկայությունն ու դավադրությունը, կամ եթե այդ խմբավորումները կամ [սիոնիստական] վարչակարգի տարրերը հատեն Իսլամական Հանրապետության սահմանները այս տարածաշրջանի միջոցով, Իրաքյան Քրդստանի բոլոր օբյեկտները կոչնչացվեն… կհասցվեն զանգվածային հարվածներ», — ասված է Իրանի պաշտպանության խորհրդի ներկայացուցիչ Ալի Աքբար Ահմադիանի գրավոր հայտարարության մեջ։ Խորհուրդը դիմել է Իրաքի քրդերի կառավարությանը՝ այս հաղորդագրության վրա ուշադրություն հրավիրելու համար։
«Նրանց պետք չեն գերձայնային հրթիռներ՝ մեզ վնաս պատճառելու համար։ 200 «Շահիդ» անօդաչու թռչող սարքերը կարող էին այստեղ մեծ վնասներ հասցնել։ Մենք չունենք հակաօդային պաշտպանության համակարգեր։ Մենք որևէ միջոց չունենք այդ իրերը երկնքից վայր գցելու համար», — ասել է պաշտոնյան։ ԱՄՆ նախագահ Դոնալդ Թրամփը բազմիցս ազդակներ է տվել այն մասին, թե ինչ է ցանկանում տեսնել Իրանում։ Նա կոչ է արել Իրանում իշխանափոխություն իրականացնել, սակայն չի հստակեցրել, թե ինչպես դա պետք է տեղի ունենա։ «Իհարկե, մենք՝ իրաքցի քրդերս, մնում ենք չեզոք դիրքում, որովհետև մեզ համար ԱՄՆ քաղաքականության վերաբերյալ հստակություն չկա։ Դա վարչակարգի լիակատար փոփոխություն է, թե՞ պարզապես անձնակազմի փոփոխություն», — ասել է քուրդ պաշտոնյան։ — «Մենք կարծում ենք, որ իշխանափոխությունն անհնար է առանց տեղում ռազմական ուժի կիրառման և մենք կարծում ենք, որ ԱՄՆ-ն այնտեղ ռազմական ուժ չի ուղարկում»։
Շաբաթ օրը պատերազմի մեկնարկից հետո Թրամփը զրուցել է Իրաքյան Քրդստանի երկու առաջնորդների հետ, սակայն ներխուժման հարցում նրանց աջակցությունը ստանալու փորձեր չի արել։
Իսրայելն ու ԱՄՆ-ը միասին են հարձակվում, այնուամենայնիվ Իրանում և Իրաքում նրանց շահերն ու գործունեությունը տեղ-տեղ տարբերվում են:
«Իսրայելն այս հարցում շատ ավելի ագրեսիվ է՝ թե՛ ռազմական առումով, թե՛ իրանցի քրդերի վրա ճնշում գործադրելու կամ նրանց պատերազմի մեջ ներքաշելու հարցում»,- նշել է պաշտոնյան՝ հավելելով, որ չկա որևէ փաստ այն մասին, թե ԱՄՆ-ն փորձում է զինել քրդերին կամ նրանց դրդել Իրանի դեմ հարձակման։
«Քրդստանի ազատ կյանք» կուսակցության (PJAK) համանախագահ Ամիր Քարիմին Axios-ին հայտնել է, որ իրենց զինված անդամներն արդեն իսկ գտնվում են Իրանի տարածքում։ Սակայն, նրա խոսքով, նրանք ապստամբություն չեն սկսի, քանի դեռ չունեն ԱՄՆ-ի աջակցությունը։
«Նախկինում երկու խոշոր ապստամբություններն էլ աջակցություն չեն ստացել, ինչը թույլ է տվել վարչակարգին երկարաձգել իր գոյությունը»,- նշել է Քարիմին։ Նա նաև հավելել է, որ իրենց կառույցը կապի մեջ է ԱՄՆ պաշտոնյաների հետ, սակայն որևէ առնչություն չունի Իսրայելի կառավարության կամ «Մոսադ» հետախուզական ծառայության հետ։
Axios-ի մեկ այլ աղբյուր՝ Իրաքյան Քրդստանի դեմոկրատական կուսակցության (KDP) ներկայացուցիչը հայտնել է, որ մինչ այժմ Իրաքի զինված ուժերին հաջողվել է կանխել Իրաքի տարածքից Իրանի դեմ քրդա-իրանական զինյալների հարձակումները։
Ըստ աղբյուրի՝ իրաքյան քրդերի առաջնորդները որոշել են չեզոքություն պահպանել այս պատերազմում։ Դա մասամբ պայմանավորված է այն մտահոգությամբ, որ Միացյալ Նահանգները որոշակի պահի կարող է հրաժարվել իրենց աջակցելուց։
