Վաշինգտոնի վարչակազմը ճնշում է գործադրում Շրի Լանկայի իշխանությունների վրա, պահանջելով ԱՄՆ ռազմածովային ուժերի խորտակած իրանական IRIS Dena ֆրեգատի նավաստիներին Իսլամական Հանրապետություն չվերադարձնել։ Այս մասին հաղորդում է Reuters-ը։
Ֆրեգատը, որի վրա գտնվում էր մոտ 130 նավաստի, մարտի 4-ին հարձակման է ենթարկվել ԱՄՆ ռազմածովային ուժերի սուզանավի կողմից և խորտակվել Շրի Լանկայի ափերի մոտ։ Շրի Լանկայի ռազմածովային ուժերը փրկել են 32 նավաստիների, որոնք բոլորը Իրանի քաղաքացիներ էին, և որոնք հոսպիտալացվել էին։ Ջրից դուրս է բերվել 87 դի։ Անձնակազմի մնացած անդամները շարունակում են անհայտ կորած մնալ։
Գործակալությունը պարզաբանել է, որ ամերիկյան դիվանագիտական նամակագրությունը, որի հետ ծանոթացել են լրագրողները, ցույց է տալիս, որ Միացյալ Նահանգները ճնշում է գործադրում Շրի Լանկայի կառավարության վրա՝ իրանական նավից ողջ մնացածներին, ինչպես նաև ներկայում հանրապետության նավահանգիստներից մեկում գտնվող Bushehr մատակարարող նավի 208 անդամից բաղկացած անձնակազմին Իսլամական Հանրապետություն չվերադարձնելու պահանջով։ Ամերիկյան կողմը Շրի Լանկայի իշխանություններին տեղեկացրել է «նվազագույնի հասցնելու Իրանի փորձերը՝ ձերբակալվածներին քարոզչական նպատակներով օգտագործելու» անհրաժեշտության մասին: Ինչպես նշվում է հրապարակման մեջ, ամերիկյան կողմը կարծում է, որ իրանական Bushehr նավը կմնա Շրի Լանկայում մինչև Իսլամական Հանրապետության դեմ ԱՄՆ-ի և Իսրայելի ռազմական գործողության ավարտը։
Շրի Լանկայի նախագահ Անուրա Կումարա Դիսանայակեն ավելի վաղ հայտարարել էր, որ Շրի Լանկայի տարածքային ջրերի մոտ գտնվող Bushehr նավի անձնակազմը տեղափոխվել է Կոլոմբո:
