Իսրայելի ֆինանսների նախարար Բեցալել Սմոտրիչի որդին վիրավորվել է լիբանանա-իսրայելական սահմանին տեղի ունեցած մարտական գործողությունների ժամանակ։ Այս մասին հայտնում է The Jerusalem Post թերթը։
Նախարարի որդին, որը ծառայում է իսրայելական բանակում, ստացել է թեթև վնասվածքներ, և նրա կյանքին վտանգ չի սպառնում, նշում է պարբերականը։ Իսրայելի պաշտպանության նախարար Իսրայել Կացը նրան մաղթել է շուտափույթ ապաքինում։
Դրանից մեկ օր առաջ «Կրոնական սիոնիզմ» ծայրահեղ աջ կուսակցությունը ղեկավարող Սմոտրիչը այցելել էր լիբանանա-իսրայելական սահման և սպառնացել, որ Բեյրութի Դահիա արվարձանը, որտեղ տեղակայված է շիական «Հեզբոլլահ» կազմակերպությունը, կարժանանա Խան Յունիսի ճակատագրին։ Գազայի հատվածի և Եգիպտոսի սահմանին գտնվող այդ քաղաքը լրջորեն ավերվել է իսրայելական բանակի բազմամսյա ռմբակոծություններից հետո։
