Ազգային ժողովի արտահերթ նիստը գումարել չի հաջողվել: «Քաղաքացիական պայմանագիր» խմբակցության պատգամավորները չեն ներկայացել, արդյունքում այն չի կայացել:
Գրանցվել է 34 պատգամավոր, ԱԺ նախագահ Ալեն Սիմոնյանի խոսքով՝ 4 ժամ կարող են սպասել քվորմանը:
Հիշեցնենք, որ ընդդիմադիր պատգամավորների հրավերով ԱԺ-ում պետք է կայանար արտահերթ նիստ: Օրակարգում «Կառավարության հրաժարականի և նոր կառավարություն ձևավորելու անհրաժեշտության մասին» հարցն էր:
Միաժամանակ, Վազգեն Գալստանյանը և նրա աջակիցները Բաղրամյան պողոտայում են: Գալստանյանը հանրահավաք է հրավիրել՝ հաջակցություն ընդդիմադիր պատգամավորների հրավիրած, սակայն չկայացած արտահերթ նիստի:
Ավելի վաղ «Քաղաքացիական պայմանագիր» խմբակցության քարտուղար Արթուր Հովհաննիսյանը «Արմենպրես»-ի հետ զրույցում հայտնել էր, որ իշխող ուժը չի մասնակցելու օրենքի ուժով գումարվելիք ԱԺ արտահերթ նիստին։
««Քաղաքացիական պայմանագիր» խմբակցությունը արտահերթ նիստին չի մասնակցելու, որովհետև ընդդիմության օրակարգը կեղծ է և չի համապատասխանում Հայաստանի Հանրապետության պետական շահերից բխող օրակարգերին։ Իսկ արտահերթ նիստն առանց մեր մասնակցության չի կարող կայանալ։ Այն օրենքի ուժով կգումարվի, բայց քվորման բացակայության պատճառով չի կայանա»,- ասել էր Հովհաննիսյանը:
