Կառավարությունը այսօրվա նիստում հավանություն տվեց ՏԿԵ նախարարության պետական գույքի կառավարման կոմիտեին ամրացված գույքերից մեկը՝ ԱՕԿՍ-ի շենքը 10 տարի ժամկետով վարձակալության տրամադրելու նախագծին:
Ներկայացնելով նախագիծը Տարածքային կառավարման և ենթակառուցվածքների նախարար Գնել Սանոսյանը ներկայացրեց շենքի նախապատմությունը. «Հիշում եք, որ վարչական դատարանի վարույթում կար գործ, որի շրջանակներում հաշտություն կնքվեց և գույքի իրավունքը տրվեց ՀՀ-ին, այնուհետև Կառավարության որոշումներից մեկով դարձրեցինք պետական գույք և ելնելով թե՛ գույքի կառավարման տեսանկյունից, թե՛ նաև այն հանգամանքից, որ այդ գույքը օգտագոծելու ցանկություն ունեցողներ կան, գույքը գնահատվել է: Ամսական վարձակալության համար այն գնահատվել է 15 միլիոն 450 հազար դրամ, առաջարկում ենք այս պայմաններով մրցույթ անցկացնել»:
Սանոսյանը նաև նկատեց, որ հաշվի առնելով շենքի կարգավիճակը ԿԳՄՍ նախարարության գործընկերները որոշակի պայմաններ ունեն, որոնք և՛ տվյալ որոշմամբ, և՛ հետագա պայմանագրում կամրագրվեն և գույքը պետք է օգտագործվի գործընկերների մասնագիտական դիտարկումներից ելնելով:
Արձագանքելով վարչապետ Նիկոլ Փաշինյանն էլ ասաց, որ իր կարծիքով ԱՕԿՍ-ի շենքը իրավական ընթացակրագերով պետությանը վերադարձված ամենատեսանելի և նշանավոր շինություւնն է, և պետք է ամեն ինչ անել, որ այդ գույքը արդյունավետ կառավարվի:
«Եթե որևէ մեկն ուզենա այդտեղ բացել օծանելիքի, հագուստի խանութ, սննդի կետ, սրճարան, ռեստորան, հույս ունեմ՝ որևէ սահմանափակում չենք դրել։ Մեր սահմանափակումն այն է, որ շենքի մշակութային բովանդակությունն ու արժեքը չվնասվի: Ենթադրվում է, որ ցանկացած մեկը, որ այնտեղ վարձակալության կվերցնի, բնականաբար պետք է վերանորոգման ու հարդարման աշխատանքներ իրականացնի, մենք ունե՞նք մեխանիզմներ, որ ԿԳՄՍՆ կողմից նախագծերը հաստատվեն ու միայն դրանից հետո ու նախարարության վերահսկողության ներքո իրականացվի աշխատանքը»,- նշեց վարչապետը:
Արձագանքելով ԿԳՄՍ նախարար Ժաննա Անդրեասյանն էլ նշել է, որ շենքը պատմամշակութային նշանակություն ունի, հուշարձան է, հետևաբար, արտաքին տեսքի, հարդարման աշխատանքները մասնագիտական դրական եզրակացությամբ պիտի արվեն․ «Պետք է վստահ լինենք, որ դրանից չի աղավաղվի շենքի արտաքին տեսքը կամ ներքին կառուցվածքը, որը նույնպես պատմամշակութային արժեք է»։
Հիշեցնենք, որ 2023 թվականի սեպտեմբերի 8-ին Հայաստանի Հանրապետության գլխավոր դատախազության և «ԱՕԿՍ» ՍՊ ընկերության բաժնետերերի միջև կնքվել էր հաշտության համաձայնություն: Համաձայնությունը նույն օրը մուտք էր արվել Վարչական դատարան:
Աբովյան 3 հասցեում գտնվող 526.9 քմ շենքի (հանրության շրջանում հայտնի «ԱՕԿՍ»-ի շենքի) և 0,0467 հա մակերեսով հողամասի սեփականության իրավունքը վերադարձվել էր Հայաստանի Հանրապետությանը:
