Ճապոնիայի կառավարությունն աշխատում է նավթի մատակարարման աղբյուրների ընդլայնման ուղղությամբ՝ Իրանին Իսրայելի և ԱՄՆ-ի հասցրած հարվածներից հետո Մերձավոր Արևելքում իրավիճակի սրման, ինչպես նաև Հորմուզի նեղուցում նավագնացության արգելափակման պայմաններում։ Այս մասին հայտարարել է Ճապոնիայի վարչապետ Սանաե Տակաիտին, հաղորդում է ՏԱՍՍ-ը։
«Ճապոնիայի կառավարությունն արդեն աշխատում է նավթի մատակարարման աղբյուրների ընդլայնման, ինչպես նաև բենզինի ներքին գների կայունացման ուղղությամբ»,- ասել է նա՝ ելույթ ունենալով խորհրդարանում։ Նրա խոսքով՝ իշխանությունները կշարունակեն հետևել իրավիճակին։
Տակաիտին չի հստակեցրել, թե հատկապես որտեղից է Ճապոնիան ծրագրում լրացուցիչ նավթ գնել։ Իր ներկրվող ողջ նավթի ավելի քան 90%-ը երկիրը ստանում է Մերձավոր Արևելքի երկրներից, ընդ որում՝ դրա զգալի մասն անցնում է Հորմուզի նեղուցով։ Հեղուկ բնական գազի ներկրման հարցում Մերձավոր Արևելքին բաժին է ընկնում մոտ 10%-ը։ Ճապոնիան տիրապետում է նավթի 254 օրվա, իսկ հեղուկ բնական գազի՝ մոտ երեք շաբաթվա պաշարների։
Ճապոնիան ստանում է հեղուկ բնական գազի ողջ ներկրման մոտ 9-10%-ը ռուսական «Սախալին-2» նախագծից, սակայն դադարեցրել է ռուսական նավթի ներկրումը՝ բացառությամբ այն խմբաքանակների, որոնք կապված են գազի մատակարարումների հետ։ Միևնույն ժամանակ, ճապոնական կողմը պահպանում է մասնակցությունը «Սախալին-1» նախագծում, որտեղից նախկինում նավթ էր գնում։
