Պատերազմը Մերձավոր Արեւելքում տեղափոխվել է նաեւ Իրանի հյուսիսային սահման. Ադրբեջանը պնդում է, որ իրանական անօդաչու թռչող սարքերը հինգշաբթի օրը հարվածել են իր Նախիջեւանի անկլավին: BBC-ի հաղորդման համաձայն՝ վնասվել է օդանավակայանի շենքը, անօդաչու թռչող սարք է պայթել դպրոցի մոտ՝ վիրավորելով խաղաղ բնակիչներին, մեկ այլ անօդաչու թռչող սարք խոցվել է:
Ադրբեջանի նախագահ Իլհամ Ալիեւը միջադեպն անվանել է «ահաբեկչական հարձակում», պահանջել Թեհրանից բացատրություն եւ ներողություն, եւ Բաքվի զինված ուժերը բերել բարձր մարտական պատրաստության վիճակի։
Նա նաեւ անդրադարձել է Իրանի էթնիկ ադրբեջանցի բնակչության հարցին, որը Թեհրանի համար զգայուն թեմա է։ Իրանը հերքում է իր մասնակցությունը հինգշաբթի օրվա հարվածներին եւ նշել է, որ հարձակումը կարող է լինել Իսրայելի դրոշի ներքո իրականացված գործողություն։
Ալիեւը նաեւ հայտնել է, որ «անկախ Ադրբեջանը հույսի վայր է Իրանում ապրող ադրբեջանցիների համար»։
Բաքուն երկար ժամանակ խուսափում էր այս թեմայից՝ Թեհրանի համար դրա զգայուն լինելու պատճառով։
20-25 միլիոն էթնիկ ադրբեջանցիները կազմում են երկրի ամենամեծ էթնիկական փոքրամասնությունը եւ կենտրոնացած են հյուսիս-արեւմուտքում՝ Ադրբեջանի հետ սահմանի երկայնքով։
Իսլամական հանրապետությունը ադրբեջանական ինքնության եւ քաղաքական պատկանելության հարցերը հետեւողականորեն դիտարկում է որպես գերակա նշանակություն ունեցող: Ալիեւը հազվադեպ է խոսել իրանական ադրբեջանցիների մասին այսքան ակնհայտ լավատեսական տոնով, եւ նրա խոսքերն այժմ թվում են մանրակրկիտ հաշվարկված քայլ։
Ալիեւի ուղերձն ընկալվում է որպես սպառնալիք. Ադրբեջանի վրա ռազմական կամ դիվանագիտական ճանապարհով ճնշում գործադրելու ցանկացած փորձ կարող է հանգեցնել Բաքվի պատասխան գործողություններին, այդ թվում՝ այնպիսի գործողությունների, որոնք կազդեն Իրանի ներքին կայունության վրա։
Ալիեւի հայտարարությունը Ադրբեջանի մասին՝ որպես «իրանական ադրբեջանցիների համար հույսի վայր», նոր եւ հնարավոր է՝ անկանխատեսելի տարր է մտցնում»,- նշվել է հրապարակման մեջ։
