«Երկու տարի առաջ խոսում էինք այն մասին, թե կլինի՞ արդյոք նոր հարձակում, թե՞ ոչ, այսօր խոսում ենք այն մասին, թե ինչ ապրանք է հնարավոր վաճառել կամ չվաճառել, կամ բենզինի գինը ինչքանով իջավ կամ չիջավ: Պատերազմից խաղաղության խոսակցությունն արդեն իսկ ֆանտաստիկ է, իսկ խաղաղությունից օգուտներ քաղելու խոսակցությունը շատ լավն է, և պետք է մաքսիմալ օգուտներ ունենանք»,- այսօր մամուլի ասուլիսում հայտարարեց էկոնոմիկայի նախարար Գևորգ Պապոյանը՝ անդրադառնալով հարցին, թե ինչու հայկական ապրանքներ չեն արտահանվում Ադրբեջան:
Նախարարն ընդգծեց, որ այդ պրոցեսը ժամանակատար է, ուսումնասիրվում են երկու երկրների շուկաները, և ի վերջո դա մասնավորի գործն է, իսկ պետությունը պայմաններ ստեղծելու քաղաքականության կրողն է:
Մեկ տարի առաջ ոչ ոք չէր պատկերացնում, որ Հայաստանն ու Ադրբեջանը առևտուր կանեն, հավելեց Պապոյանը:
