Իրանը շարունակում է իրականացնել իր խաղաղ միջուկային ծրագիրը, որի օրինականությունը ամրագրված է ՄԱԿ-ի Անվտանգության խորհրդի 2231 բանաձևում, հայտարարել է Իրանի արտաքին գործերի նախարարության խոսնակ Էսմայիլ Բաղային, հաղորդում է Tasnim-ը։
Նա ընդգծել է, որ Իսրայելի ագրեսիան իրանական միջուկային օբյեկտների դեմ վնասել է Միջուկային զենքի չտարածման մասին պայմանագրին (NPT):
Նրա խոսքով՝ Իրանը ակնկալում է, որ եվրոպական երկրները կկենտրոնանան Իսրայելի ագրեսիայի դադարեցման վրա և կդատապարտեն իրանական միջուկային օբյեկտների վրա հարձակումները։
Բաղային նշել է, որ Իրանի միջուկային գործունեությունը գտնվում է ԱԷՄԳ-ի հսկողության ներքո և ենթարկվում է ամենախիստ ստուգումների, ինչը նշանակում է, որ ծրագրի ոչ խաղաղ բնույթի կասկածելու որևէ պատճառ չկա։
«Իրանի միջուկային ծրագիրը կենդանի է», — ասել է նա՝ ընդգծելով, որ Իրանի միջուկային իրավունքները, որոնք ամրագրված են ՄԱԿ-ի Անվտանգության խորհրդի 2231 բանաձևում, չեն կարող խլվել որևէ կազմակերպության կողմից։
