Լոս Անջելեսը բացեց դռները հայկական ՖԵՄԻՆՆՈ-ի համար, որը կանանց եւ նորարարության շուրջ ամենամեծ հարթակն է Հայաստանում և ամբողջ Հարավային Կովկասում։ Կազմակերպությունը պաշտոնապես նշանավորել է իր լոսանջելեսյան մասնաճյուղի բացումը տեղի հայկական համայնքի սրտում՝ Գլենդելում, վերջինիս քաղաքապետ Էլեն Ասատրյանի մասնակցությամբ։
«Անհամբեր սպասում ենք ձեր հիանալի աշխատանքին և այն հնարավորություններին, որոնք դուք կբերեք համայնքին՝ հզորացնելով կանանց իրենց նախաձեռնություններում հաջողության հասնելու համար և ստեղծելով առաջնորդության ու նորարարության հարթակ», — նշված է Գլենդելի քաղաքապետարանի հատուկ շնորհակալագրում, որը քաղաքապետ Ասատրյանն անձամբ է հանձնել ՖԵՄԻՆՆՈ-ի հիմնադիր Սեդա Պապոյանին իր բացման խոսքից հետո։
Հիմնադրված լինելով Հայաստանում՝ ՖԵՄԻՆՆՈ-ն գլոբալ շարժում է, որն աջակցում է կանանց հզորացմանը նորարարության, առաջնորդության և STEM ոլորտում (գիտություն, տեխնոլոգիա, ճարտարագիտություն և մաթեմատիկա) սահմանները հաղթահարելու միջոցով։ ՖԵՄԻՆՆՈ-ի առաքելությունն է կոտրել գենդերային ստերեոտիպերը և ստեղծել հնարավորություններ կանանց համար՝ աճելու և զարգանալու։ Լոսանջելեսյան նախաձեռնությունը ՖԵՄԻՆՆՈ-ի առաջին միջազգային պաշտոնական մասնաճյուղն է։
«Հայաստանում անցած երեք փոխակերպող տարիներից հետո և արբանյակային միջոցառումներ անցկացնելով Սան Ֆրանցիսկոյում և Սիդնեյում՝ մենք շատ ոգեւորված ենք ՖԵՄԻՆՆՈ-ի ճամփորդությունն ուղղել դեպի Լոս Անջելես։ Սա հնարավորություն է՝ զարգացնելու տեղական հայկական տաղանդը և միաժամանակ ներգրավելու բազմազան համայնք՝ թե՛ կանանց, թե՛ տղամարդկանց», — նշել է ՖԵՄԻՆՆՈ-ի հիմնադիր Սեդա Պապոյանը։
Մեկնարկային միջոցառմանը հանդես են եկել ճանաչված բանախոսներ, ովքեր մեծ ներդրում ունեն թե՛ տեղական, թե՛ միջազգային մակարդակներում։ Նրանց թվում էր դոկտոր Կարինե Սարգսյանը՝ Սիդարս-Սինայի բժշկական կենտրոնի քաղցկեղի բիոբանկի գիտական տնօրենը, ճշգրիտ բժշկության փորձագետ, ապագայագիտության գիտնական և բեսթսելլեր հեղինակ։ Նրան էին միացել Զարիկ Բողոսյանը՝ ZEMA Group-ի նախագահը և տեխնոլոգիական ձեռնարկատեր՝ 30 տարուց ավելի փորձով առաջատար տեխնոլոգիաներում։ Լինդա Մեգերդիչյանը՝ թվային ապարատային դիզայնի ինժեներ, ով մասնագիտացած է բարձր արագությամբ ազդանշանների մշակման սարքերում, նույնպես կիսվեց իր փորձով։ Հայաստանյան հյուրերից էր Մարիամ Թորոսյանը՝ Safe YOU հարթակի հիմնադիր և գործադիր տնօրենը, ով ներկայացրեց իր տեսլականը կանանց և աղջիկների համար ապահով թվային տարածք ստեղծելու վերաբերյալ։ Նրա հարթակը ներկայումս գործում է վեց երկրում, ներառյալ ԱՄՆ-ում՝ պայքարելով գենդերային բռնության դեմ տեխնոլոգիայի միջոցով։ Երեկոն հարուստ էր նաև այլ ոլորտների՝ ակադեմիական, ձեռնարկատիրական և արվեստի համայնքների ներկայացուցիչների ելույթներով։
Միջոցառման շրջանակում տեղի ունեցավ ինտերակտիվ քննարկում հետեւյալ թեմայով՝ «Երբ կանայք են առաջնորդում STEM-ում. արդյո՞ք նրանք բավարար նորարար են, թե՞ փորձում են հասցնել»։
Լոսանջելեսյան միջոցառման կարեւոր նորությունն էր ՖԵՄԻՆՆՈ-ի նոր նախաձեռնության՝ AI Girls-ի (ԱԲ Աղջիկներ) մեկնարկը՝ ուղղված Հայաստանում և դրա սահմաններից դուրս երիտասարդ աղջիկների հզորացմանը արհեստական բանականության ոլորտում։
«Պատկերացրեք, որ աղջիկները սկսում են հասկանալ արհեստական բանականությունը (ԱԲ) դեռ միջնակարգ դպրոցում, հետագայում դառնալով ոչ միայն օգտվողներ, այլև ստեղծողներ ու որոշում կայացնողներ։ Սա է մեր տեսլականը AI Girls-ի պարագայում», — նշել է Սեդա Պապոյանը՝ հայտարարելով առցանց դրամահավաքի մեկնարկի մասին այս նախաձեռնությանը աջակցելու համար։
Որպես կանանց եւ նորարարաության եզակի հարթակ՝ ՖԵՄԻՆՆՈ-ն կառուցում է գլոբալ ցանց՝ տեղական մասնաճյուղերով՝ հրավիրելով բոլոր նրանց, ովքեր հետաքրքրված են տեխնոլոգիաներով, առաջնորդությամբ և նորարարության հանդեպ, միանալու այս ընդլայնվող շարժմանը։
ՖԵՄԻՆՆՈ-ի և նրա ծրագրերի մասին՝ www.feminno.com
