ՆԳՆ ոստիկանությունը հաղորդագրություն է տարածել՝ Վազգեն (Բագրատ) Գալստանյանի գլխավորած հավաքի մասնակիցներին հորդորելով զերծ մնալ հակաիրավական գործողություններից, հարգել այլոց իրավունքները, ենթարկվել հասարակական կարգի պահպանություն իրականացնող ոստիկանության ծառայողների օրինական պահանջներին:
ՆԳՆ-ից զգուշացրել են, որ հակաօրինական ցանկացած դրսևորում կարժանանա համապատասխան քրեաիրավական գնահատականի:
«ՆԳՆ ոստիկանությունը հետևողականորեն շարունակելու է իր ողջ գործիքակազմով իրականացնել օրենքով իրեն վերապահված գործառույթները՝ ապահովելով հասարակական կարգը և քաղաքացիների անվտանգությունը»,- ասված է հայտարարության մեջ։
Նշենք, որ Վազգեն (Բագրատ) Գալստանյանն իր համակիրների հետ վաղ առավոտից քայլերթ էր իրականացնում Երևանի փողոցներում, այժմ նրանք այն շենքի դիմաց են, որտեղ տեղակայված է նաև ԱԳՆ-ն:
