Մեղրիի նախկին համայնքապետ, «Հայաստան» դաշինքի նախկին պատգամավոր Մխիթար Զաքարյանը հերքում է լրատվամիջոցներում շրջանառվող տեղեկությունը, թե պատրաստվում է «Քաղաքացիական պայմանագիր» կուսակցության ցուցակով Մեղրի համայնքի ղեկավարի պաշտոնում առաջադրվել:
«Անհիմն, փուչ խոսակցություններ են, էդ լուրերի ոչ մի տառը ճիշտ չէ: Այդ խոսակցությունները հիմք չունեն: Ո՛չ էդպիսի հարց է եղել, ո՛չ էդպիսի քննարկում է եղել, երևակայության արդյունք է»,- Aysor.am-ի հետ զրույցում ասաց Մեղրիի նախկին ղեկավարը:
Մխիթար Զաքարյանը պնդեց, որ քաղաքական դաշտ վերադառնալու նպատակ չունի:
Հարցին՝ իշխանության կողմից առաջարկ լինելու դեպքում ՔՊ-ի ցուցակով կառաջադրվի՞ Մեղրիի համայնքապետի պաշտոնում՝ Զաքարյանն արձագանքեց. «Որ կողմից էլ առաջարկ լինի, կմերժեմ, ընդհանրապես, էդպիսի մտադրություն չունեմ: Ես զբաղված եմ անձնական գործերով»:
Հիշեցնենք՝ վերջին շրջանում մամուլում հրապարակումներ կան, ըստ որի՝ սյունեցի երբեմնի ընդդիմադիր համայնքապետերից երկրորդն էլ է ճամբարափոխ եղել․ Մեղրիի նախկին համայնքապետ, «Հայաստան» դաշինքի նախկին պատգամավոր Մխիթար Զաքարյանն էլ է հայտ ներկայացրել՝ առաջիկայում սպասվող Մեղրի համայնքի ղեկավարի ընտրություններին մասնակցելու, ընդ որում՝ ՔՊ ցուցակով:
Մխիթար Զաքարյանը հայտնի «սյունյաց ողջույններ»-ի հեղինակներից էր և Աննա Հակոբյանի հասցեին կոշտ արտահայտություն էր թույլ տվել, ապա հրապարակավ ներողություն խնդրել, որից հետո հեռացել էր քաղաքական դաշտից և վերադարձել բիզնես դաշտ։
