Ընդդիմադիր «Ուժեղ Հայաստան» դաշինքից պատգամավոր Էդգար Ղազարյանը օգոստոսի 17-ին խորհրդարանում լրագրողների հետ զրույցում հերքել է այն լուրերը, թե իրեն արգելել են ելույթ ունենալ և հարցեր տալ։
Պատասխանելով ելույթ ունեցողների թվում իր բացակայության մասին հարցին՝ Ղազարյանը պարզաբանել է, որ խմբակցությունից ելույթների թիվը սահմանափակ է։ «Ձեր տեղեկությունները սխալ են։ Հավանաբար գիտեք, որ խմբակցություններից ելույթների քանակը սահմանափակելու վերաբերյալ պայմանավորվածություն կա, և մեր խմբակցության մյուս պատգամավորներն էլ պետք է ելույթ ունենան։ Չէ՞ որ ես միայնակ չեմ կարող բոլոր թեկնածությունների վերաբերյալ ելույթ ունենալ», — նշել է պատգամավորը։
Ավելի վաղ իշխող կուսակցության ներկայացուցիչները Ղազարյանից պահանջել էին հրապարակային ներողություն խնդրել իրենց հասցեին «սրիկա» բառը օգտագործելու համար, սակայն պատգամավորը հրաժարվել էր ներողություն խնդրել։
