Վիզաների ազատականացման գործընթացի շրջանակում մինչև տարեվերջ Հայաստանը կարող է ավելի դրական արդյունքներ արձանագրել։ Այս մասին այսօր հրավիրած ասուլիսում հայտարարել է ՀՀ ՆԳ նախարարի տեղակալ Արմեն Ղազարյանը։
«Եվրամիության հետ վիզաների ազատականացման երկխոսության մասով կարող եմ ասել, որ մենք ակտիվ աշխատանքային փուլում ենք։ Մայիսին ստացել ենք գործողությունների ծրագրի իրականացման առաջին առաջընթացի զեկույցը։ Զեկույցը բավական դրական է գնահատել այդ ուղղությամբ Հայաստանի կատարած քայլերը»,- ասել է Ղազարյանը։
Նրա խոսքով՝ Հայաստանին ներկայացվել է 53 առաջարկություն, որոնք նախատեսված են հետագա աշխատանքների իրականացման համար։
«Դրա շրջանակում մենք 117 գործողություն ենք մշակել, կեսից ավելին արդեն կատարված է»,- նշել է փոխնախարարը։
Ղազարյանի խոսքով՝ գնահատականներն ու առաջարկությունները վերաբերում են վիզաների ազատականացման գործողությունների ծրագրի առաջին փուլին, որն ընդգրկում է օրենսդրության և քաղաքականության մշակման ուղղությունները։
