Պառակտում է տեղի ունեցել Թուրքիայի Ժողովրդահանրապետական կուսակցության՝ երկրի գլխավոր ընդդիմադիր ուժի ներսում, փոխանցում է Սպուտնիկ Արմենիան։
Ավելի վաղ հայտնի էր դարձել, որ Անկարայի դատարանն անվավեր է ճանաչել ԺՀԿ-ի 38-րդ համագումարի (որը կայացել էր 2023 թվականի նոյեմբերի 4-5-ին) արդյունքները, որի ժամանակ կուսակցության նոր առաջնորդ էր ընտրվել Օզգյուր Օզելը:
Դատարանի որոշման հիմք են հանդիսացել իբր հայտնաբերված խախտումները՝ կապված, ենթադրաբար, համագումարի պատվիրակներին կաշառելու հետ։ Դատարանը որոշել է Օզելին հեռացնել կուսակցության ղեկավարությունից և կառավարումը ժամանակավորապես փոխանցել ԺՀԿ նախկին նախագահ Քեմալ Քըլըչդարօղլուին:
Քեմալականների նախկին առաջնորդը ցանկություն է հայտնել վերադառնալ իր գրասենյակ, ինչը հարուցել է ԺՀԿ բազմաթիվ կողմնակիցների դժգոհությունը։
Կուսակցության ներսում փաստացի պառակտում է տեղի ունեցել։ Օզելի կողմնակիցները ամոթանք են տվել Քըլըչդարօղլուին՝ հայտարարելով, որ նա համագործակցում է իշխանությունների հետ։
