Կատալոնիայի ոստիկանությունը ձերբակալել է Ջոնաթան Անդիկին՝ հոր՝ Mango հագուստի խանութների սրահների ցանցի հիմնադիր Իսակ Անդիկի սպանության կասկածանքով: Այս մասին հայտնում է Reuters-ը։
Իսակ Անդիկը մահացել է 2024 թվականի դեկտեմբերի 14-ին՝ Բարսելոնայում ժայռից ընկնելու հետևանքով։ Այդ օրը նա զբոսնում էր որդու հետ, ով դարձել է ողբերգության միակ վկան։
Մի քանի շաբաթ անց գործարարի մահվան գործը փակվել էր, սակայն 2025 թվականի մարտին Մարտորել քաղաքի դատարանը վերսկսել է հետաքննությունը։
Ոստիկանության մոտ կասկածներ են առաջացրել մահացածի ժառանգորդի հակասական ցուցմունքները։
Պարզվել է նաև, որ լեռներ մեկնելուց առաջ նա խնդրել է հոր թիկնապահին իրենց մենակ թողնել։ Բացի այդ, Ջոնաթան Անդիկի ընկերուհին՝ գոլֆիստ Էստեֆանիա Կնուտը, հայտարարել է, որ նա հոր հետ ունեցել է լարված հարաբերություններ։
Իսակ Անդիկը Mango ընկերությունը հիմնադրել է եղբոր՝ Նահմանի հետ 1984 թվականին։ 2023 թվականի տվյալներով՝ ընկերության հասույթը կազմել է 3,1 միլիարդ եվրո։
Անդիկի կարողությունը գնահատվում էր 4,5 միլիարդ դոլար։ Նա ընդգրկված էր Իսպանիայի ամենահարուստ մարդկանց լավագույն հնգյակում:
