Քարոզարշավի հերթական օրը ՀՀ վարչապետ Նիկոլ Փաշինյանն ու «Քաղաքացիական պայմանագիր» կուսակցության անդամների մի մասը քարոզարշավը շարունակում են Երևանում:
Այս անգամ շրջայցերը Աջափնյակ վարչական շրջանում են:
ՀՀ վարչապետը շրջում է թաղամասերով, զրուցում քաղաքացիների հետ, նրանց հետ խոսում նախորդ տարիներին կատարված աշխատանքներից ու սպասվող ծրագրերից:
«Ես ուզում եմ ասել, որ պատմությունը Ձեզ Գարեգին Նժդեհ 2-րդ մականունն է տալու»։
Աջափնյակում քարոզարշավի ժամանակ մի կին այս մասին ասել է ՀՀ վարչապետ Նիկոլ Փաշինյանին։
«Սենց բան մի՛ ասեք, հիմա Հանրապետականները հարձակվելու են ձեզ վրա»,- պատասխանել է Փաշինյանը։
Նա նաև անդրադարձել է Մակրոնի հետ հանդիպմանը:
«Մակրոնի հետ պետական բաժակաճառը հրապարակվե՞լ է, այո, խոր ապրումներ կար իմ մեջ, դուք ճիշտ նկարագրեցիք»,- նշել է Փաշինյանը:
Անդրադառնալով քաղաքացու հիշատակած ճանապարհների քանդված լինելու ու կրպակներին ջուր ու հոսանք մատակարարելու թեմային՝ Փաշինյանն ասել է՝ «վերքերիս աղ մի՛ լցրեք»:
«Մեծ պրոբլեմ է, նույնիսկ տեղ կա, որ մայրուղու վրա է դա արվում, տուգանքներ լինում են տենց դեպքերում, բայց արդեն քանդած է լինում: Հիմա աշխատելու ենք մեր ասֆալտ արած տեղերում ենթակառուցվածքները գույքագրենք, որ քանդելու կարիք չլինի»:
