Փարիզի Լուվրի հայտնի կողոպուտից հետո գողերի զոհ է դարձել նաև Լոզանի Հռոմեական հնագիտական թանգարանը, հայտնում է Euronews-ը։
Շվեյցարիայի իշխանությունները որոնում են երկու գողերի, որոնք հարձակվել են թանգարանի պահակի վրա, կոտրել ցուցափեղկը և հափշտակել տասնյակ ոսկե մետաղադրամներ։
Քաղաքային ոստիկանությունը հայտնել է, որ կասկածյալները տոմս են գնել ու սպասել, մինչև մյուս այցելուները դուրս գան, ապա թանգարանի փակվելուց քիչ առաջ հարձակվել են պահակի վրա և կոտրել ցուցափեղկը։
Գողացված մետաղադրամների դրամական արժեքը անմիջապես չի հայտարարվել, սակայն ոստիկանությունը նշել է, որ դրանք «հնագիտական արժեք» ունեն։
Կողոպուտը տեղի է ունեցել այն ժամանակ, երբ ոսկու գները կտրուկ աճել են համաշխարհային շուկաներում, իսկ Փարիզի Լուվրում տեղի ունեցած հայտնի կողոպուտը ցույց է տվել թանգարանների անվտանգության համակարգերի խոցելիությունը։
Պաշտոնյաները հայտնել են, որ Լոզանի թանգարանի պահակը՝ 64-ամյա շվեյցարացին, հարցաքննվել է քննիչների կողմից և միջադեպի հետևանքով չի տուժել։
Շվեյցարիայի դատախազները սկսել են քննություն։ Լոզանի քաղաքային իշխանությունները դատական հայց են ներկայացրել թանգարանին հասցված վնասի համար, իսկ տարածաշրջանային կառավարությունը՝ ոսկե մետաղադրամների սեփականատերը, հայտարարել է քրեական գործ հարուցելու մտադրության մասին։
